ٹریفک جرمانہ منسوخ ہونے پر رقم کیسے واپس ہوگی

سعودی محکمہ ٹریفک نے ٹریفک خلاف ورزی پر منسوخ جرمانے کی رقم واپس لینے کا طریقہ کار جاری کیا ہے۔

عاجل ویب سائٹ کے مطابق محکمہ ٹریفک نے ٹوئٹر پر بیان میں کہا ہے کہ جس اکاؤنٹ سے ٹریفک خلاف ورزی کے جرمانے کی رقم ادا کی گئی، اسی اکاؤنٹ میں منسوخ جرمانے کی رقم واپس کردی جائے گی۔

محکمہ ٹریفک نے اس سے قبل جاری کردہ بیان میں کہا تھا کہ مقامی شہری اور مقیم غیرملکی مخصوص ٹریفک خلاف ورزی پر کیے جانے والے جرمانے کے حوالے سے اعتراض ریکارڈ کراسکتے ہیں۔ 

محکمہ ٹریفک کا کہنا تھا اگر کسی کو جرمانے پر اعتراض ہو تو وہ آن لائن شکایت درج کراسکتا ہے۔ اس کے لیے اسے خدماتی پھر خدمات المرور اور اس کے بعد ٹریفک خلاف ورزیوں پر اعتراض والے خانے کو پش کیا جاتا ہے۔ 

سعودی محکمہ ٹریفک  کے مطابق آن لائن اعتراض ٹریفک خلاف ورزی کے اندراج کے 30 روز کے اندر اندر کیا جاسکتا ہے۔

 مقامی شہریوں نے دریافت کیا تھا کہ ’اگر ٹریفک اتھارٹی نے اعتراض تسلیم کرلیا اور جرمانے کو غیر قانونی قرار دے دیا تو ایسی صورت میں ادا شدہ جرمانے کی رقم واپس ملے گی یا نہیں اور اس کا طریقہ کار کیا ہوگا‘۔ 

محکمہ ٹریفک نے اس کا جواب دیتے ہوئے واضح کیا تھا کہ ’ٹریفک خلاف ورزی پر اعتراض ٹریفک اتھارٹی کی جانب سے درست مانے جانے کی صورت میں جرمانہ منسوخ ہوجاتا ہے اور حاصل شدہ جرمانے کی رقم اسی اکاؤنٹ میں واپس کردی جاتی ہے جس اکاؤنٹ میں وہ رقم ادا کی گئی ہوتی ہے‘۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں