بچوں کو متعدی امراض سے بچانے کے لیے ایس ایف ڈی اے کی گائیڈ بک جاری
جمعرات 29 اپریل 2021 22:18
گائیڈ بک ایس ایف ڈی اے کی سرکاری ویب سائٹ پر بھی ہے- (فوٹو عرب نیوز)
سعودی فوڈ اینڈ ڈرگ اتھارٹی (ایس ایف ڈی اے ) نے بچوں کو متعدی امراض سے بچانے کے لیے ویکسینوں کی اہمیت، ضرورت اور تاثیر کے بارے میں والدین کے لیے گائیڈ بک جاری کردی- متعدی امراض، بچوں کی صحت و سلامتی کے لیے خطرہ ہوتے ہیں-
اخبار 24 کے مطابق ایس ایف ڈی اے نے گائیڈ بک میں متعدی امراض کا تعارف کرایا ہے- بتایا گیا ہے کہ متعدی بیماریاں کیا کیا ہوتی ہیں اور بچوں کو ان سے کس قسم کی تکلیفیں لاحق ہوتی ہیں- یہ بھی بتایا گیا ہے کہ خناق متعددی امراض میں سب سے خطرناک ہوتا ہے-
ایس ایف ڈی اے نے متعدی امراض سے متعلق اہم معلومات پر روشنی ڈالتے ہوئے یہ بھی بتایا کہ یہ بیماریاں ایک سے دوسرے میں کس طرح منتقل ہوتی ہیں- ان کی علامتیں کیا ہیں- بچوں کو متعدی بیماریوں سے بچاؤ کے لیے ویکسین دی جاتی ہے تو ان پر اس کے کیا اثرات پڑتے ہیں-
ایس ایف ڈی اے نے والدین کو توجہ دلائی کہ اگر ویکسین لینے پر بچے مخصوص مشکلات سے دوچار ہوں تو ایسی صورت میں وہ کیا کریں- گائیڈ بک ایس ایف ڈی اے کی سرکاری ویب سائٹ پر بھی جاری کردی گئی ہے- جہاں سے تفصیلی معلومات حاصل کی جاسکتی ہیں-
واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں