غزہ کے 20 لاکھ افراد کی فوری ضروریات پورا کرنا پہلی ترجیح: امریکی وزیر خارجہ

امریکی وزیر خارجہ انتونی بلنکن بدھ کو اپنے سفارتی مشن کے آخری مرحلے میں مصر کے بعد اردن پہنچے ہیں۔ ان کے اس دورے کا مقصد اسرائیل اور حماس کے درمیان 11 روزہ جنگ کا خاتمے کرنے والے معاہدے کو تقویت پہنچانا ہے۔ 

مصر اور اردن پہنچنے سے ایک دن قبل انتونی بلنکن نے اسرائیلی اور فلسطینی رہنماؤں سے تفصیلی بات چیت کی۔ 

خبر رساں اداروں اے پی اور رائٹرز کے مطابق انتونی بلنکن نے مصر کے صدر عبد الفتاح السيسی اور دیگر اعلی حکام سے ملاقات کی۔  

امریکی وزیر خارجہ بعد میں اردن  روانہ ہوئے اور عمان میں شاہ عبداللہ دوم سے ملاقات کی ہے۔ 

انتونی بلنکن نے تباہی سے بری طرح متاثر غزہ کی از سر نو تعمیر کے لیے ’بین الاقوامی حمایت حاصل کرنے‘ کے عزم کا اظہار بھی کیا ہے جبکہ اس بات کا وعدہ بھی کیا کہ اس علاقے کو ملنے والی کوئی بھی امداد حماس تک نہیں پہنچے گی۔ 

اس کے بجائے وہ حماس کی حریف اور بین الاقوامی سطح پر تسلیم شدہ فلسطینی اتھارٹی کو تقویت دینے کی کوشش کر رہے ہیں۔ 

امریکی وزیر خارجہ نے اس سفر کے لیے معمولی اہداف طے کیے ہیں۔ یہ ان کا مشرق وسطی کا پہلا سرکاری دورہ ہے۔ اس دورے کے بنیادی اہداف غزہ کی تعمیر نو اور یروشلم میں پیدا ہونے والے تناؤ کو کم کرنے میں مدد کرنا ہے۔ 

تاہم انہوں نے یہ واضح کر دیا ہے کہ امریکہ نے فریقین کے مابین امن مذاکرات کے لیے فوری طور پر کوئی منصوبہ نہیں رکھا ہے اور کئی دہائیوں سے جاری تنازع کی بنیادی وجوہات کی نشاندہی کرنے کے لیے بہت کم کام کیا ہے حالانکہ انہوں نے ’بہتر ماحول‘ بنانے کی امید ظاہر کی ہے جو مذاکرات کا سبب بن سکتی ہے۔ 

مصری صدر سے ملاقات کے بعد انھوں نے امریکی سفارتی عملے سے ملاقات میں مصر کو ایک ’حقیقی اور موثر شراکت دار‘ کے طور پر بیان کیا جس نے غزہ جنگ کے خاتمے میں مدد فراہم کی اور ’کسی مثبت چیز کی تعمیر‘ میں مدد کی۔ 

خیال رہے کہ مصر کے صدرعبد الفتاح السيسی نے فائر بندی کے اعلان سے پہلے اور بعد میں گذشتہ ہفتے امریکی صدر جو بائیڈن سے بات کی تھی۔ 

عبد الفتاح السيسی نے انتونی بلنکن کو بتایا کہ اسرائیلیوں اور فلسطینیوں کے مابین تازہ ترین پیشرفت نے واشنگٹن کی شمولیت کے ساتھ دونوں فریقوں کے مابین براہ راست مذاکرات کی ضرورت کی تصدیق کر دی ہے۔ 

مصری ایوان صدر نے اپنے بیان میں کہا ہے کہ واشنگٹن اور قاہرہ نے غزہ کی پٹی میں جنگ بندی کو مستحکم کرنے اور تعمیر نو کے عمل کو شروع کرنے میں اپنے ربط کو مستحکم کرنے پر اتفاق کیا ہے۔ 

مصر اور اردن دونوں امریکہ کے اہم حلیف ہیں اور ان کے اسرائیل کے ساتھ امن معاہدے بھی ہیں اکثر اسرائیل اور فلسطینیوں کے درمیان ثالث کا کردار ادا کرتے رہے ہیں۔ 

امریکی خبر رساں ایجنسی اے پی کے مطابق اردن کے شاہ سے ملاقات کے بعد نامہ نگاروں سے گفتگو کرتے ہوئے امریکی وزیر خارجہ کا کہنا تھا کہ جنگ بندی کرانا اہم تھا۔

‘ہم جنگ بندی کو کسی خاتمے کے طور پر نہیں بلکہ کچھ کام کرنے کے لیے شروعات کے طور پر دیکھتے ہیں‘۔

انہوں نے مزید کہا کہ ’ہماری پہلی ترجیح غزہ کے بیس لاکھ افراد کی فوری ضروریات کو پورا کرنا ہے۔ اور بہتر حالات پیدا کرنا ہے جس میں ہم آگے بڑھنے کی کوشش کر سکتے ہیں۔‘

 اس سے قبل انتونی بلنکن نے مصر سے اردن روانگی سے قبل کہا کہ ’مجھے لگتا ہے کہ ہم دونوں پختہ یقین رکھتے ہیں کہ فلسطینی اور اسرائیلی سلامتی کے ساتھ رہنے کےمستحق ہیں۔‘