Sorry, you need to enable JavaScript to visit this website.

’نماز کے دوران تجارتی مراکز کی بندش کی پابندی اٹھائی جائے‘

ارکان شوری کی سفارش میں کہا گیا کہ جمعے کا دن مستثنی رکھا جائے(فوٹو ٹوئٹر)
سعودی ارکان شوری عطا الثبیتی، ڈاکٹر فیصل الفاضل، ڈاکٹر لطیفہ الشعلان اور ڈاکٹر لطیفہ العبد الکریم نے سفارش کی ہے کہ ’اوقات نماز کے دوران تجارتی ادارے بند کرنے کی پابندی اٹھالی جائے‘۔
سفارش میں کہا گیا کہ’ جمعے کا دن اس سے مستثنی رکھا جائے۔ پٹرول سٹیشنوں اور فارمیسیوں پر سے بھی یہ  پابندی اٹھانے کی بھی سفارش کی گئی ہے‘۔ 
عکاظ اخبار کے مطابق ارکان شوری نے یہ سفارش اسلامی و عدالتی امور کی کمیٹی کے سامنے رکھی ہے جو وزارت اسلامی امور کی رپورٹ کے حوالے سے تیار کی گئی ہے۔
باخبر ذرائع کا کہنا ہے کہ ایوان میں پیر کو اس سفارش پر ووٹنگ ہوگی۔ 
ارکان شوری نے تجویز کا جواز پیش کرتے ہوئے کہا کہ’ نماز کے دوران تجارتی مراِکز بند کرنے کا رواج پوری مسلم دنیا میں سعودی عرب کے سوا کہیں نہیں۔ مملکت میں بھی اس کا سلسلہ چند عشروں سے ہے‘۔ 
 ارکان شوری کا کہنا ہے کہ ’تجارتی ادارے عوام کی خدمت کرتے ہیں اور دیگر سرکاری و نجی اداروں کی طرح ان کا کام  روزگار کا حصول ہے جس طرح سرکاری اور نجی ادارے اوقات نماز کے دوران بند نہیں ہوتے۔ اسی طرح تجارتی اداروں پر سے بھی پابندی اٹھانی چاہئے‘۔

 

شیئر: