سامان سے لدے اونٹ، ’مارگلہ میں صبح کی ٹریفک‘

اسلام آباد میں متعین برطانوی ہائی کمشنر کرسچین ٹرنر نے مارگلہ کی پہاڑیوں میں اونٹوں کے ذریعے سامان منتقل کیے جانے کی ایک تصویر شیئر کر کے لکھا ہے کہ ’مارگلہ میں سنیچر کی صبح کی ٹریفک۔‘

کرسچین ٹرنر نے اس تصویر میں محکمہ وائلڈ لائف کے ٹوئٹر ہینڈل کو بھی ٹیگ کیا ہے جس پر سوشل میڈیا صارفین دلچسپ تبصرے کر رہے ہیں۔

سینیئر صحافی ماریانہ بابر نے کرسچین ٹرنر کی تصویر پر تبصرہ کرتے ہوئے لکھا کہ ’کوئی بھی پینٹنگ اس سے زیادہ خوبصورت نہیں ہو سکتی۔‘

احسن نامی صارف نے اونٹوں کی تصویر پوسٹ کرنے پر جواب میں برطانوی ہائی کمشنر کو ازراہِ مذاق لکھا کہ ’امید ہے کہ یہ لندن نہیں جا رہے ہوں گے۔ بصورت دیگر آپ نے ان کو بھی قرنطینہ میں رکھ لینا ہے کہ ریڈ لسٹ میں شامل ملک سے آ رہے ہیں۔‘

آفتاب نامی ٹوئٹر ہینڈل نے کرسچین ٹرنر کے بارے میں لکھا کہ ’اس شخص کو فطری مناظر سے بہت محبت ہے۔‘

منصور علی بخاری نے کرسچین ٹرنر کی توجہ پاکستان میں کورونا کیسز کی طرف دلاتے ہوئے کہا کہ ’براہ کرم، اپنی حکومت کو بتائیے اور پاکستان کو ریڈ لسٹ سے نکالنے کے لیے اپنے حصے کا کردار ادا کیجیے۔‘

اجمل بنگش نامی صارف نے برطانوی ہائی کمشنر کی تصویر پر لکھا کہ ’بہت عمدہ اور خوبصورت۔‘