Sorry, you need to enable JavaScript to visit this website.

مظفرآباد: علی امین گنڈا پور کے قافلے پر پتھراؤ، گارڈ کی جوابی فائرنگ

پاکستان کے زیرانتظام کشمیر میں 25 جولائی کو انتخابات ہو رہے ہیں (فوٹو: اے ایف پی)
پاکستان کے زیرانتظام کشمیر کے دارالحکومت مظفرآباد کے نواحی علاقے کھن بندوے میں جمعرات کی شام تحریک انصاف کے رہنما اور وفاقی وزیر امور کشمیر علی امین گنڈاپور کے قافلے پر نامعلوم افراد نے پتھراؤ کیا اور ان کے قافلے کو روک دیا۔ علی امین گنڈا پور کے گارڈز نے جواب میں ہوائی فائرنگ کی۔
یہ واقعہ ضلع مظفر آباد کے حلقہ دو لچھراٹ میں پیش آیا جہاں سے پاکستان تحریک انصاف کےامیدوار چوہدری شہزاد ہیں جب ان کی مدمقابل مسلم لیگ نواز کے مرتضی گیلانی اور پیپلز پارٹی کے سید بازل علی نقوی ہیں۔
مظفرآباد کے مقامی افراد کے مطابق علی امین گنڈاپور جہلم ویلی لائن آف کنٹرول کے قریب واقع علاقے چناری میں ایک انتخابی جلسے سے خطاب کرنے جا رہے تھے۔
اس واقعے پر تاحال کشمیر کے الیکشن کمیشن کا کوئی ردعمل سامنے نہیں آیا ہے۔
سوشل میڈیا پر شیئر ہونے والی ویڈیوز میں سے ایک میں کچھ نوجوانوں علی امین گنڈاپور کے قافلے پر پتھراؤ کرتے دکھائی دے رہے ہیں۔ 
ایک اور ویڈیو میں کچھ لوگوں کو وفاقی وزرا کے قافلے کا راستہ روکتے ہوئے بھی دیکھا جا سکتا ہے۔
ایک اور ویڈیو میں قافلے میں موجود  سفید شلوار اور قمیض میں ملبوس ایک شخص ہوئی فائرنگ کرتے ہوئے دکھائی دے رہا ہے۔  مذکورہ شخص کے بارے میں کہا جارہا ہے کہ یہ وفاقی وزیر کا گارڈ ہے۔
ایک دن قبل بدھ کے روز علی امین گنڈا کے قافلے پر مظفرآباد ڈویژن کے حلقہ تین کھاوڑہ میں ٹماٹر پھینکے جانے کا واقعہ بھی پیش آیا تھا۔
دو روز قبل ضلع باغ میں ہونے والے ایک جلسے کے دوران علی امین گنڈا پور پر ایک نوجوان نے جوتا بھی اچھال دیا تھاجسے پولیس نے گرفتار کر لیا تھا اور اگلے روز وہ رہا بھی ہو گیا تھا۔
پاکستان کے زیر انتظام کشمیر کے الیکشن 2021 کی مہم کے دوران علی امین گنڈاپور کا نام متعدد تنازعات کے ساتھ ذرائع ابلاغ میں زیر بحث آ رہا ہے۔
چند دن قبل کشمیر کے چیف الیکشن کمیشنر نے علی امین گنڈا پور کی جانب سے  ڈڈیال کے ایک انتخابی جلسے میں کھلے عام پیسے بانٹنے کے واقعے کے بعد ان کے خلاف ایف آئی آر درج کرانے کا حکم بھی جاری کیا تھا۔
دوسری جانب پاکستان تحریک انصاف کے عہدیدار اور وزیر مملکت فرخ حبیب واقعے کے حوالے سے ٹویٹ کرتے ہوئے لکھا کہ ’انتخابی مہم کے دوران راجہ فاروق حیدر کے حواریوں کی جانب سے مراد سعید اور علی امین گنڈا پور کے قافلہ پر حملے کی مذمت کرتے ہیں۔‘
ان کا مزید کہنا تھا کہ ’شکست کے خوف سے ن لیگ اپنی روایتی غنڈا گردی اور گلوکریسی پر اتر آئی ہے۔
ان دنوں پی ٹی آئی کے علاوہ مسلم لیگ ن اور پاکستان پیپلز پارٹی سمیت دیگر سیاسی جماعتیں پاکستان کے زیرانتظام کشمیر میں اتنخابی مہم  چلا رہی ہیں۔

شیئر: