کورونا کے نئے کیسز تیسرے دن بھی 100 سے کم

سعودی عرب میں  پیر 13 ستمبر کو  تیسرے دن بھی  کورونا کے نئے کیسز 100 سے کم سامنے آئے ہیں جبکہ فعال کیسز کی تعداد میں بھی کمی آئی ہے۔ 

پیر کو سبق نیوز نے وزارت صحت کی جانب سے جاری بیان کے حوالے سے بتایا کہ ’گذشتہ 24 گھنٹوں کے دوران کورونا کے 75 نئے مریض سامنے آئے جبکہ 66 افراد صحت یاب بھی ہوئے۔

وزرات صحت کے مطابق ’گذشتہ 24 گھنٹوں کے دوران کورونا کے مزید 5 مریض چل بسے، جس کے بعد مرنے والوں کی مجموعی تعداد بڑھ کر آٹھ ہزار 623 ہو گئی ہے۔‘

وزارت کا کہنا ہے کہ ’مملکت میں کورونا کے فعال کیسز کی تعداد کم ہو کر 2 ہزار 295 رہ گئی ہے، جن میں سے 481 مریضوں کی حالت نازک ہے جو انتہائی نگہداشت کے یونٹس میں زیرعلاج ہیں۔‘

وزارت صحت کی جانب سے جاری ہونے والے اعداد و شمار کے مطابق ’سب سے زیادہ مریض ریاض ریجن میں سامنے آئے، جن کی تعداد 35 ہے جبکہ مکہ ریجن میں 10 افراد میں وائرس کی تصدیق ہوئی۔‘

الشرقیہ ریجن 5، مدینہ ریجن میں 5، جازان ریجن میں 3، قصیم ریجن میں 3، عسیر ریجن میں 3، نجران ریجن میں 3، الجوف ریجن میں 3 ،حائل ریجن میں 2 ، تبوک ریجن، الباحہ ریجن اور الحدود الشمالیہ میں ایک ایک مریض سامنے آئے۔

اب تک پانچ لاکھ 46 ہزار 67 افراد میں کورونا وائرس کی تصدیق ہو چکی ہے، جن میں سے پانچ لاکھ 35 ہزار 144 افراد شفایاب بھی ہوئے ہیں۔

وزارت صحت کا کہنا ہے کہ ’کورونا سے بچاؤ کے لیے مقررہ احتیاطی تدابیر پر عمل کرنا ضروری ہے، جن میں سماجی فاصلے کا اصول انتہائی اہم ہے۔‘