سچن تندولکر کا نام پنڈورا پیپرز میں: ’دیا پتہ لگاؤ کہ یہ ہو کیا رہا ہے‘

پنڈورا پیپرز میں دنیا بھر کی مالدار اور طاقتور ترین شخصیات میں ایک نام انڈین کرکٹ ٹیم کے سابق کپتان سچن تندولکر کا بھی ہے۔

آئی سی آئی جے نے اپنی تحقیق میں کہا ہے کہ اس کی حاصل کردہ خفیہ دستاویزات سے معلوم ہوا ہے کہ آف شور اثاثے رکھنے والوں میں سنگر شکیرا اور سچن تندولکر جیسے بڑے نام بھی شامل ہیں۔

سچن تندولکر کی اہلیہ انجلی تندولکر اور سسر آنند مہتا برٹش ورجن آئی لینڈ کی کمپنی میں ڈائریکٹرز تھے۔

تاہم سچن تندولکر کی فاؤنڈیشن کے سی ای او نے انڈین ایکسپریس کو بتایا کہ ’اس آف شور کمپنی میں سرمایہ کاری سابق انڈین کپتان نے اپنے جائز پیسے سے کی ہے جس پر ٹیکس بھی ادا کیا گیا ہے۔

لیکن سوشل میڈیا پر صارفین ان کے آف شور اثاثوں پر سوالات اٹھاتے نظر آ رہے ہیں۔

اشوک سوین نامی صارف نے لکھا کہ ’تندولکر کو قوم پرستی تب یاد آتی ہے جب ریحانہ ٹویٹ کرتی ہیں، لیکن اسے وہ آف شور اکاؤنٹس میں پیسے جمع کرتے وقت بھول جاتے ہیں۔‘

پرینکا چوپڑہ نامی صارف نے مزاح کا سہارا لیتے ہوئے تندولکر کے آف شور اثاثوں پر تنقید کی۔

انڈیا کے مشہور ڈرامے سی آئی ڈی کے معروف ترین کردار پرادیومن کی تصویر لگا کر انہوں نے کہا کہ ’دیا پتہ لگاؤ کہ یہ ہو کیا رہا ہے۔‘

گنیشن نامی صارف نے لکھا کہ انہوں نے راہل ڈریوڈ کو ہمیشہ تندولکر سے زیادہ عظیم سمجھا اور پنڈورا لیکس نے ان کی سوچ کو تقویت دی۔

’ان سے بھارت رتنہ واپس لیا جائے۔‘

جہاں کچھ لوگوں نے سابق انڈین کرکٹر پر تنقید کی وہیں کچھ لوگ ان کی طرفداری کرتے ہوئے بھی نظر آئے۔

ربید افتخار محبوب نامی صارف نے ایک ٹویٹ میں لکھا کہ ’آپ ان پر داغ نہیں لگا سکتے۔ مجھے فرق نہیں پڑتا کہ انہوں نے اپنے پیسے کے ساتھ کیا کیا۔‘

انہوں نے مزید کہا کہ’مجھے صرف اس سے مطلب ہے کہ وہ اپنے بیٹ کے ساتھ کیا کرتے تھے۔ سچن! سچن!۔‘