حکومت پنڈورا پیپرز میں شامل افراد کے خلاف تحقیق کر کے ایکشن لے گی: عمران خان

وزیراعظم عمران خان نے بین الاقوامی ادارے آئی سی آئی جے کی جانب سے  مالی امور پر مشتمل دنیا کی سب سے بڑی تحقیقات ’پینڈورا پیپرز‘ کا خیر مقدم کرتے ہوئے اعلان کیا ہے کہ ان کی حکومت ان میں سامنے آنے والے پاکستانی شہریوں کے خلاف تحقیقات کرکے ان کے خلاف کاروائی کرے گی۔

اتوار کو ٹوئٹر پر اپنے ردعمل میں انہوں نے کہا کہ ’ہم پنڈورا پیپرز کا خیر مقدم کرتے ہیں جن میں اشرافیہ کی غیر قانونی دولت کو بے نقاب کیا گیا ہے جو کرپشن اور ٹیکس چوری سے حاصل کی گئی اور مالیاتی ٹھکانوں پر غیر قانونی طور پر پہنچائی گئی۔ اقوام متحدہ کی جنرل اسمبلی کے پینل ایف اے سی ٹی آئی نے حساب لگایا ہے کہ اس طرح چوری شدہ سات ٹریلین ڈالر کی خطیر رقم آف شور ٹیکس ٹھکانوں پر رکھی گئی ہے۔‘

انہوں نے مزید کہا کہ ’میری حکومت پنڈورا پیپرز میں شامل تمام (پاکستانی) شہریوں کی تحقیقات کرے گی اور اگر کوئی غیر قانونی چیز ثابت ہوئی تو مناسب کاروائی کی جائے گی۔ میں بین الاقوامی برادری سے مطالبہ کرتا ہوں کہ اس سنگین بے انصافی کو ماحولیاتی تبدیلی کے بحران کی طرح دیکھیں۔‘

انہوں نے اپنے بیان میں کہا کہ ’اگر اس پر قابو نہ پایا گیا تو غریب اور امیر ریاستوں کے درمیان عدم مساوات غریب ملکوں میں غربت کے اضافے کا باعث بنے گا۔ اس سے غریب ملکوں سے امیر ملکوں میں معاشی ہجرت کا سیلاب آئے گا اور پوری دنیا میں معاشی عدم استحکام پیدا ہوگا۔‘

وفاقی وزیر برائے منصوبہ بندی اسد عمر نے کہا ہے کہ ’پنڈورا پیپرز قوانین کی ایک واضح یاد دہانی ہیں جو کہ نام نہاد محفوظ پناہ گاہوں کی اجازت دیتے ہیں جو لوٹ کی سہولت فراہم کرتے ہیں جو ترقی پذیر ممالک میں لوٹ مار میں سہولت کاری فراہم کرتے ہیں اور لوٹی گئی دولت کو رزادری کے پردوں میں چھپاتے ہیں۔‘

انہوں نے کہا کہ ’یہ کروڑوں لوگوں کو غریب کر رہا ہے اور عالمی تباہی کا باعث بن رہا ہے۔ اس کو روکنے کا وقت آ گیا ہے۔‘

وفاقی وزیر خزانہ شوکت ترین نے ایک نجی پاکستانی ٹی وی کے ساتھ بات کرتے ہوئے کہا ہے کہ ’ایف بی آر کو کہیں گے سب کے خلاف تحقیقات کریں۔‘

وفاقی وزیر اطلاعات فواد چوہدری نے کہا ہے کہ نواز شریف اور زرداری کی کرپشن کے مزید پرت سامنے آئے ہیں۔

انہوں نے کہا کہ ’قوم نے پہلے پاناما اور اب پنڈورا میں ان کے چہروں سے نقاب اترتے دیکھا۔‘

پنجاب کے سینیئر وزیر اور صوبائی وزیر خوراک عبدالعلیم خان نے کہا ہے کہ ان کی کمپنی کو تمام اثاثوں میں ظاہر کیا گیا تھا۔ 

انہوں نے لکھا، ’الحمداللہ، کچھ چھپانے کو نہیں، گذشتہ 15 سال سے یہ کمپنی ایف بی آر اور الیکشن کمیشن میں تمام اثاثوں میں ظاہر کی گئی۔‘