’منی ہائسٹ دیکھنے والوں کو چاند رات مبارک‘

مشہور ترین ہسپانوی سیریز ’منی ہائسٹ‘ کے آخری سیزن کا آخری حصہ جمعہ 3 دسمبر کو نیٹ فلکس پر ریلیز کردیا جائے گا۔

نیٹ فلکس نے رواں سال ستمبر میں ’منی ہائسٹ‘ کے آخری سیزن کا پانچ قسطوں پر مشتمل پہلا حصہ ریلیز کیا تھا اور اس سیریز کا آخری حصہ بھی پانچ قسطوں پر مشتمل ہوگا۔ 

ٹوئٹر پر لاکاسا دا پاپل (منی ہائسٹ) کے ٹوئٹر اکاؤنٹ نے کہا کہ ’کہانی 24 گھنٹوں میں ختم ہورہی ہے۔‘                                                                                                                                                                                                                                                                                                                                                                                                   

یہ شو ایک بار پھر سوشل میڈیا پر ٹاپ ٹرینڈز میں سے ایک ہے۔ عبدالباسط نامی صارف نے ایک ٹویٹ میں کہا کہ ’منی ہائسٹ دیکھنے والوں کو چاند رات مبارک۔‘

انڈیا کے مشہور یوٹیوبر بھوون بام نے ’منی ہائسٹ‘ کے فائنل حصے کا پریمیئر سپین میں اٹینڈ کیا۔ پروفیسر اور ان کی ٹیم کے ساتھ تصاویر انہوں نے ٹوئٹر پر شیئر کیں اور لکھا کہ ’انہیں میں آرتورو کو مارنے کے مشورے دیے۔‘

’آرتورو‘ سوشل میڈیا کی صارفین کی آرا کے مطابق سب سے زیادہ ناپسندیدہ کردار ہے۔

اب سوال یہ ہے کہ اس شو کا اختتام کیسے ہوگا؟ کیا بینک آف سپین میں پھنسی پروفیسر کی ٹیم سونا لوٹنے میں کامیاب ہوگی؟ یا اس بار ان کا زندہ بچ کر نکلنا مشکل ہوگا؟

اس حوالے سے ثاقب نامی صارف پیشین گوئی کرتے ہیں کہ پروفیسر اور ان کی پوری ٹیم اس شو کے اختتام پر ماری جائے گی۔

یقیناً اس شو کے مداحوں کو اس کے ختم ہونے پر دکھ تو ہوگا لیکن پروفیسر جارہا ہے تو کیا ہوا، ’برلن‘ تو واپس آرہا ہے نا۔

’لا کاسا ڈا پاپل‘ (منی ہائسٹ) نے اعلان کیا ہے کہ سیریز میں پروفیسر کے بھائی کا کردار ادا کرنے والے ’برلن‘ پر مبنی فلم 2023 میں ریلیز ہوگی۔