’تھپڑ کے بدلے تھپڑ‘: مریم نواز کے اقدام پر نئی بحث، اس کی قانونی حیثیت کیا ہے؟

پنجاب کے شہر فیصل آباد میں ایک دکان پر سیلز اسسٹنٹ کو تشدد کا نشانہ بنانے کی ویڈیو سوشل میڈیا پر وائرل ہوئی تو پولیس نے کارروائی کرتے ہوئے ملزم کو گرفتار کر لیا۔ تاہم معاملہ اس وقت ایک نئی بحث کا موضوع بن گیا جب پولیس سٹیشن میں ریکارڈ کی گئی ایک ویڈیو سامنے آئی، جس میں متاثرہ خاتون کو ہتھکڑیوں میں جکڑے ملزم کو تھپڑ مارتے دیکھا جا سکتا ہے۔

وزیراعلیٰ پنجاب مریم نواز نے بھی یہ ویڈیو سوشل میڈیا پر شیئر کی اور اپنے پیغام میں کہا کہ کسی غریب یا کمزور پر ہاتھ اٹھانے والے کو اب جواب کے لیے بھی تیار رہنا چاہیے۔

یہ پہلا موقع نہیں کہ مریم نواز نے کسی متاثرہ شخص کو ملزم کو تھپڑ مارنے کا موقع دینے کے اقدام کی حمایت کی ہو۔ اس سے قبل لاہور میں ایک سکوٹی سوار خاتون اور پیٹرول پمپ کے ملازم پر تشدد کے واقعات کے بعد بھی اسی نوعیت کی ویڈیوز سامنے آ چکی ہیں۔

مریم نواز کے اس طرزِ عمل کو بعض حلقے طاقتور افراد کے خلاف ایک علامتی پیغام قرار دے رہے ہیں، جبکہ دوسری جانب اس کی قانونی حیثیت اور پولیس کی تحویل میں ملزمان کے ساتھ برتاؤ پر سوالات اٹھائے جا رہے ہیں۔

کیا متاثرہ شخص کو ملزم سے بدلہ لینے کا موقع دینا انصاف کے تقاضوں سے مطابقت رکھتا ہے، یا ریاست کی ذمہ داری یہ ہے کہ وہ قانون کے مطابق کارروائی کرتے ہوئے ملزم کو عدالت سے سزا دلوائے؟

فیصل آباد میں سیلز اسسٹنٹ پر تشدد، ملزم گرفتار

آٹھ نومبر کو فیصل آباد کے کوہ نور پلازہ میں ایک دکان کے مالک اور سیلز اسسٹنٹ کے درمیان تلخ کلامی تشدد میں بدل گئی، جس کی سی سی ٹی وی فوٹیج سوشل میڈیا پر وائرل ہو گئی۔

ویڈیو میں دیکھا جا سکتا ہے کہ خاتون دکان کے کاؤنٹر کے پیچھے کرسی پر بیٹھی ہیں کہ اسی دوران ایک شخص انہیں کاؤنٹر کے پیچھے سے گھسیٹ کر نیچے گرا دیتا ہے اور تشدد کا نشانہ بناتا ہے۔

فیصل آباد پولیس نے سوشل میڈیا پلیٹ فارم ایکس پر واقعے کی سی سی ٹی وی فوٹیج شیئر کرتے ہوئے بتایا کہ سینٹرل پولیس آفیسر تنویر حسین کے نوٹس پر تھانہ مدینہ ٹاؤن پولیس نے خاتون پر تشدد کرنے والے ملزم کو گرفتار کر کے قانونی کارروائی شروع کر دی ہے۔

پولیس کی اس پوسٹ میں وزیراعلیٰ پنجاب مریم نواز کی تصویر کے ساتھ انگریزی میں ’نیور اگین‘ (Never Again) بھی لکھا تھا، جس کا مطلب ہے کہ ایسا واقعہ دوبارہ نہیں ہونے دیا جائے گا۔

تاہم اس واقعے نے اس وقت ایک نیا رخ اختیار کیا جب پولیس سٹیشن میں ریکارڈ کی گئی ایک اور ویڈیو منظرِ عام پر آئی۔ اس میں ملزم کے ہاتھ پیچھے کی جانب ہتھکڑیوں سے بندھے ہوئے ہیں اور متاثرہ خاتون اسے تھپڑ مارتی دکھائی دیتی ہیں۔

مریم نواز نے نو نومبر کو یہ ویڈیو ایکس پر شیئر کرتے ہوئے لکھا کہ اگر کوئی کسی غریب یا کمزور پر ہاتھ اٹھاتا ہے تو اسے اب جواب کے لیے بھی تیار رہنا چاہیے۔

وزیراعلیٰ پنجاب کا کہنا تھا کہ کوئی بھی شخص، خواہ وہ کتنا ہی امیر، بااثر یا طاقتور کیوں نہ ہو، کسی عام شہری کو دھمکا یا نقصان نہیں پہنچا سکتا۔ ان کے مطابق حکومت کمزور اور مظلوم افراد کے ساتھ کھڑی ہوگی اور اختیارات کا ناجائز استعمال کرنے والوں کے خلاف کارروائی کرے گی۔

انہوں نے مزید کہا کہ اب امیر کو غریب پر اور طاقتور کو کمزور پر ظلم کرنے کی کھلی چھوٹ نہیں ملے گی اور حکومت اس کا جواب دے گی۔

لاہور میں سکوٹی سوار خاتون کا واقعہ

فیصل آباد کا واقعہ اپنی نوعیت کا پہلا معاملہ نہیں جس میں پولیس کی تحویل میں موجود ملزم کو متاثرہ شخص کے ہاتھوں تھپڑ مارتے دکھایا گیا ہو اور وزیراعلیٰ پنجاب نے اس عمل کی حمایت کی ہو۔

اس سے قبل اکتوبر میں لاہور کے علاقے مزنگ رنگ روڈ پر سکوٹی سوار ایک خاتون کو مبینہ طور پر ایک موٹر سائیکل سوار نے راستہ روک کر تشدد کا نشانہ بنایا تھا۔

واقعے کی سی سی ٹی وی فوٹیج میں ملزم کو خاتون کو سکوٹی سے گراتے، تھپڑ مارتے اور ان کے بال کھینچتے دیکھا گیا تھا۔

واقعے کے بعد مریم نواز نے متاثرہ خاتون سے گفتگو کی اور سوشل میڈیا پر بتایا کہ انہوں نے خاتون کو کہا تھا کہ وہ ملزم کو اتنے ہی تھپڑ واپس ماریں جتنے اسے مارے گئے تھے۔

تاہم متاثرہ خاتون نے جواب میں کہا تھا کہ حکومت کی جانب سے انہیں تحفظ اور انصاف کی یقین دہانی ہی کافی ہے۔

بعد ازاں عدالت کی جانب سے ملزم کی ضمانت منظور کیے جانے پر بھی وزیراعلیٰ پنجاب نے سوشل میڈیا پر افسوس کا اظہار کیا تھا۔

پیٹرول پمپ ملازم پر تشدد اور پولیس سٹیشن میں تھپڑ

لاہور ہی میں اکتوبر کے دوران پیٹرول پمپ کے ایک ملازم پر تشدد کا واقعہ بھی سامنے آیا تھا۔

رپورٹس کے مطابق ایک شخص نے سگریٹ نوشی سے منع کرنے پر پیٹرول پمپ کے ملازم کو تھپڑ مارے اور تشدد کا نشانہ بنایا تھا۔

بعد ازاں پولیس کی جانب سے ملزم کی گرفتاری کے بعد سامنے آنے والی ویڈیو میں متاثرہ ملازم کو پولیس سٹیشن میں زیرِ حراست شخص کو تھپڑ مارتے دیکھا گیا۔

مریم نواز نے 23 اکتوبر کو یہ ویڈیو بھی سوشل میڈیا پر شیئر کی تھی اور اسے ان افراد کے لیے پیغام قرار دیا تھا جو دولت اور طاقت کی بنیاد پر خود کو قانون سے بالاتر سمجھتے ہیں۔

وزیراعلیٰ پنجاب کا کہنا تھا کہ انصاف صرف امیر اور طاقتور طبقے کا حق نہیں بلکہ ہر شہری کا بنیادی حق ہے اور کسی شخص کی دولت یا اثر و رسوخ اسے قانون سے بالاتر نہیں کر سکتا۔

ان واقعات کے بعد ایک بار پھر یہ بحث شروع ہو گئی ہے کہ کیا متاثرین کو ملزمان کے خلاف اس طرح ردعمل دینے کا موقع دینا ریاستی انصاف کی علامت ہے یا اس سے قانون کے طے شدہ طریقہ کار پر سوالات اٹھتے ہیں؟

’ملزم کے جرم کا فیصلہ خود کرنے کا اختیار کسی کو نہیں‘

قانونی ماہرین کے مطابق کسی شخص پر جرم کا الزام عائد ہونا اور عدالت میں اس کا جرم ثابت ہونا دو مختلف مراحل ہیں۔ قانون کے تحت کسی ملزم کو سزا دینے کا اختیار عدالتوں کے پاس ہے، نہ کہ کسی فرد یا پولیس اہلکار کے پاس۔

اس حوالے سے سابق اسسٹنٹ اٹارنی جنرل سردار محمد مصروف نے اردو نیوز سے گفتگو کرتے ہوئے کہا کہ کسی بھی شخص کو یہ اختیار حاصل نہیں کہ وہ کسی ایسے شخص کے جرم کا فیصلہ خود کرے جس پر ابھی صرف الزام عائد ہوا ہو۔

ان کے مطابق اگر کسی شخص کے ساتھ زیادتی یا کوئی جرم پیش آتا ہے تو اسے متعلقہ تھانے میں درخواست دے کر مقدمہ درج کروانا چاہیے، جس کے بعد قانونی طریقہ کار کے مطابق کارروائی عمل میں لائی جاتی ہے۔

سردار محمد مصروف کا کہنا تھا کہ کسی اعلیٰ عہدے پر فائز شخصیت کی جانب سے متاثرہ فرد کو ملزم سے بدلہ لینے کی ترغیب دینا بھی درست نہیں۔

انہوں نے کہا کہ اگر ریاست ہی لوگوں کو قانون اپنے ہاتھ میں لے کر بدلہ لینے کی اجازت دے گی تو پھر عدالتوں اور پراسیکیوشن کا کردار باقی نہیں رہے گا۔

ان کے مطابق قانونی طریقہ کار یہ ہے کہ ملزم کو عدالت میں پیش کیا جائے، شواہد کے ذریعے اس پر عائد الزامات ثابت کیے جائیں اور جرم ثابت ہونے کی صورت میں عدالت اسے سزا دے۔

سابق اسسٹنٹ اٹارنی جنرل نے ایسے اقدامات کی حوصلہ شکنی پر زور دیتے ہوئے کہا کہ اس سے عدالتی نظام پر عوام کا اعتماد مزید متاثر ہو سکتا ہے۔

انصاف یا بدلے کی علامت؟

مریم نواز کی جانب سے ان واقعات کی ویڈیوز شیئر کرنے اور متاثرہ افراد کو ملزمان پر تھپڑ مارنے کا موقع دینے کے اقدامات پر سوشل میڈیا پر مختلف آرا سامنے آ رہی ہیں۔

بعض صارفین اسے ان افراد کے لیے ایک علامتی جواب قرار دیتے ہیں جو اپنے مالی وسائل اور اثر و رسوخ کی بنیاد پر کمزور شہریوں کو تشدد کا نشانہ بناتے ہیں۔ ان کے نزدیک ایسے اقدامات سے یہ پیغام جاتا ہے کہ طاقتور افراد بھی اپنے رویے کے نتائج سے نہیں بچ سکتے۔

تاہم ناقدین کا مؤقف ہے کہ ملزم کی گرفتاری کے بعد اسے پولیس کی تحویل میں متاثرہ شخص کے سامنے لانا اور اسے تھپڑ مارنے کی اجازت دینا قانون کی حکمرانی اور منصفانہ عدالتی عمل کے اصولوں سے مطابقت نہیں رکھتا۔

اس بحث کا ایک اہم پہلو یہ بھی ہے کہ اگر کسی ملزم کو جرم ثابت ہونے سے پہلے سزا دینے کا اختیار متاثرہ فرد یا کسی دوسرے شخص کو دے دیا جائے تو پھر ملزم کے قانونی حقوق اور بے گناہی کے اصول کا تحفظ کیسے ممکن ہوگا؟

یوں پنجاب میں سامنے آنے والے یہ واقعات صرف تشدد کے خلاف حکومتی ردعمل تک محدود نہیں رہے بلکہ ریاستی اختیار، انصاف کی فراہمی اور قانون کی بالادستی سے متعلق ایک وسیع تر بحث کا موضوع بن گئے ہیں۔