شوہر اور ساس، سسر کے ہاتھوں شامی خاتون کے قتل کی وڈیو وائرل

شام میں پیش آنے والے انسانیت سوز واقعے نے عرب دنیا کے سوشل میڈیا کو ہلا کر رکھ دیا- خاوند اور اس کے رشتے داروں کے ہاتھوں شامی خاتون کے قتل کی وڈیو نے تہلکہ مچا دیا تھا-

الامارات الیوم کے مطابق شامی وزارت داخلہ نے آیات الرفاعی پر تشدد میں ملوث شوہر اور اس کے اہل خانہ کے اقبالی بیانات میڈیا کو جاری کردیے-

آیات کے شوہر، اس کے سسر اور ساس نے اعتراف کرلیا ہے کہ ’وہی اس کے قتل کے ذمے دار ہیں- وہ اس کے ساتھ ہمیشہ بدسلوکی کرتے تھے‘-

شامی وزارت داخلہ نے ایک وڈیو کلپ جاری کیا ہے جس میں آیات الرفاعی کے سسر احمد الحموی اعتراف کررہے ہیں کہ ’انہیں آیات کے طور طریقے پسند نہیں تھے- اسے آتے جاتے، زینہ چڑھتے اترتے زدوکوب کیا کرتے تھے- میں، میری بیوی اور بیٹا تینوں مل کر اسے مارتے تھے‘-

الحموی نے بتایا کہ ’قتل کی رات میں نے اس کے  سر اور جسم پر ڈنڈے برسائے تھے- میرے بعد میرے بیٹے نے اس کے سر پر وار کیا تھا- اس رات میرے دوسرے بیٹے کا بیٹا آیا- اس نے بھی آیات پر تشدد کیا‘-

آیات کے شوہر غیاث الحموی نے بتایا کہ ’واردات کے روز ہم نے اسے خوب زدوکوب کیا- میرے والد نے اس کے سر اور جسم پر دو بار ڈنڈے برسائے-  میں اپنے والد کے ساتھ اختلاف کی وجہ دریافت کرنے کے  لیے کمرے میں گیا تو ہم دونوں کا جھگڑا ہوگیا- میں نے اس کا سر کئی بار دیوار میں دے مارا اور پھر کمرے سے باہر آگیا’-

شوہر نے بتایا کہ ’وہ اپنے بھائی کے ہمراہ ہسپتال گیا اور اس نے بیوی کے رشتے داروں سے  حقیقت حال چھپانے کی کوشش کی‘-

آیات کی ساس نے بھی اپنے بیٹے اور شوہر کے بیانات کی تائید کی-

شامی وزارت داخلہ نے بتایا کہ ’اس نے آیات کے دیور ابوالعز کو گرفتار کرلیا گیا ہے- وہ آیات کے رشتے داروں کو دھمکیاں دے رہا تھا اور ان پر مقدمہ ختم کرانے کے لیے دباؤ ڈال رہا تھا- شامی وزارت داخلہ کا کہنا ہے کہ آیات  کے شوہر، ساس، سسر اور دیور کو عدالت میں پیش کیا جائے گا‘-

اردو نیوز واٹس ایپ ، اپنی پسند کا گروپ جوائن کریں