بچوں کے ویکسینیشن سینٹرز کا خوبصورت ماحول

سعودی وزارت صحت کا کہنا ہے کہ پانچ سے 11 برس کے بچوں کی ویکسینیشن کے لیے ’توکلنا‘ اور ’صحتی‘ ایپ پر پہلے سے اپائنٹمنٹ کی سہولت فراہم کردی گئی ہے۔ 

عاجل نیوز نے وزارت صحت کے حوالے سے مزید کہا ہے کہ مملکت کے تمام ریجنزمیں پانچ سے 11 برس کے بچوں کے لیے ویکسینیشن کے دو مرحلے بنائے گئے ہیں۔ 

پہلے مرحلے میں ایسے بچوں کو ویکسین فراہم کی گئی جو کسی قسم کے امراض کا شکار تھے جبکہ دوسرے مرحلے میں عام بچوں کو ویکسین لگانے کا آغاز کیا گیا ہے۔ 

وزارت صحت نے بچوں کو ویکسین لگانے کے لیے سینٹرز میں خصوصی انتظامات کیے ہیں جہاں کارٹون کرداروں کی تصاویر اور رنگ برنگے سٹیکرز چسپاں کرکے خوشنما ماحول بنایاا گیا ہے۔ 

ویکسین کے حوالے سے وزارت صحت نے ٹوئٹر پر خصوصی شارٹ فلم بھی اپ لوڈ کی ہے، جس میں دکھایا گیا ہے کہ ویکسین لگوانے کے لیے جانے والے بچے وہاں کے ماحول سے خوش ہیں۔ 

سینٹر کے عملے کو اس بات کی خصوصی تربیت دی گئی ہے کہ وہ انجیکشن کا خوف بچوں سے کس طرح دور کریں، جس کے لیے سینٹرزمیں موجود عملہ بچوں کو رنگ برنگے کارٹون کرداروں کے سٹیکرز بھی فراہم کرتا ہے جبکہ انہیں مختلف کھلونے بھی دیے جاتے ہیں تاکہ بچے کسی خوف کے بغیرسینٹر میں آئیں۔ 

سینٹر کے باہر بچوں کا استقبال کرنے کے لیے بھی خصوصی اہلکاروں کو تعینات کیا گیا ہے جو آنے والے بچوں سے انتہائی نرمی و خوش اخلاقی سے پیش آتے ہیں اور انہیں ویکسینیشن بوتھ میں لے جاتے ہیں۔

وزارت کی جانب سے بچوں کے لیے بنائی گئی وڈیو غیرمعمولی طور پر مقبول ہورہی ہے جسے دیکھ  کر بچے ویکسین لگوانے کے لیے فوراً تیار ہوجاتے ہیں۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں