آسٹریلوی ٹیم کو دورہ پاکستان کے دوران دھمکی دینے والا شخص گرفتار

پاکستان کے صوبہ پنجاب کے شہر فیصل آباد کی پولیس نے پاکستان کا دورہ کرنے والی آسٹریلوی ٹیم کو دھمکی دینے والے ملزم کو گرفتار کرلیا ہے۔

جمعرات کو پنجاب پولیس کی جانب سے جاری کردہ بیان میں کہا گیا ہے کہ ’ملزم نے آسڑیلوی وزارت داخلہ کے نمبر پر کال کر کے آسٹریلوی ٹیم پر لاہور میں حملے کی دھمکی دی تھی۔‘

ملزم کی گرفتاری کے حوالے سے فیصل آباد پولیس نے بتایا ہے کہ ’تھانہ غلام محمد آباد پولیس نے سرفراز کالونی میں کارروائی کرتے ہوئے ملزم عرفان نصیر کو گرفتار کیا۔ ملزم کو تکنیکی ذرائع بروئے کار لاتے ہوئے گرفتار کیا گیا۔‘

’ملزم عرفان نصیر کے خلاف انسداد دہشت گردی ایکٹ اور ٹیلی گراف ایکٹ کے تحت مقدمہ درج کر لیا گیا ہے۔‘

واضح رہے کہ رواں برس فروری میں 24 سال بعد آسٹریلیا کی ٹیم نے پاکستان کا دورہ کیا تھا۔ یہ 1998 کے بعد آسٹریلوی کرکٹ ٹیم کا پہلا دورہ پاکستان تھا۔

24 سال بعد پاکستان کے دورے پر آنے والی آسٹریلوی کرکٹ ٹیم کے ایک رکن کے اہل خانہ کو مبینہ طور پر دھمکیاں بھی دی گئی تھیں۔ تاہم آسٹریلوی کرکٹ بورڈ نے کہا تھا کہ ’پاکستان میں کھلاڑیوں کو کوئی خطرہ نہیں ہے۔‘

کرکٹ آسٹریلیا کی جانب سے جاری بیان میں کہا گیا تھا کہ ’کرکٹ آسٹریلیا سوشل میڈیا کی ایک پوسٹ سے مکمل باخبر ہے۔ پی سی بی، کرکٹ آسٹریلیا اور دونوں اطراف کی سرکاری سکیورٹی ایجنسیوں نے اس پوسٹ کی نوعیت اور مواد کی تحقیقات کی ہیں۔‘

اس تاریخی سیریز میں آسٹریلیا کا پلڑا بھاری رہا اور اس نے گرین شرٹس سے ٹیسٹ سیریز جیتنے کے ساتھ ساتھ واحد ٹی20 میچ بھی اپنے نام کیا جبکہ تین ون ڈے میچز کی سیریز میں پاکستان کامیاب رہا۔

گذشتہ سال ستمبر میں پاکستان کے دورے پر آئی نیوزی لینڈ ٹیم کو بھی دھمکیاں دی گئی تھیں۔

یاد رہے کہ نیوزی لینڈ کی ٹیم نے 17 ستمبر 2021 کو راولپنڈی میں ہونے والے پہلے میچ سے کچھ دیر قبل سکیورٹی وجوہات کو جواز بناتے ہوئے دورہ پاکستان منسوخ کردیا تھا۔ اس کے بعد پاکستانی حکام نے انکشاف کیا تھا کہ نیوزی لینڈ کی جانب سے پاکستان کا دورہ منسوخ کرنے کے پیچھے جھوٹی دھمکیاں انڈیا سے بنائے گئے ای میل اکاؤنٹ سے نیوزی لینڈ کے کھلاڑیوں کو بھیجی گئی تھیں۔