ساف فٹبال چیمپئن شپ: انڈیا نے پاکستان کو شکست دے کر ٹائٹل اپنے نام کر لیا
ساف فٹبال چیمپئن شپ: انڈیا نے پاکستان کو شکست دے کر ٹائٹل اپنے نام کر لیا
منگل 17 نومبر 2026 20:00
پاکستان نے میچ کا آغاز اچھے انداز میں کیا اور پہلے ہاف میں انڈیا کے مقابلے میں بہتر کھیل پیش کیا (فوٹو: پی ایف ایف)
انڈیا نے پاکستان کو ساف فٹبال چیمپئن شپ 2026 کے فائنل میں 2-1 سے شکست دے کر ٹائٹل اپنے نام کر لیا ہے۔
منگل کو نیشنل سٹیڈیم ڈھاکہ میں کھیلے گئے فیصلہ کن مقابلے میں پاکستان شاہینز نے پہلے ہاف میں شاندار کھیل پیش کرتے ہوئے برتری حاصل کی، لیکن دوسرے ہاف میں جنید شاہ کو ریڈ کارڈ دکھائے جانے کے بعد میچ کا پانسہ پلٹ گیا اور انڈیا نے ٹائٹل اپنے نام کرلیا۔
پاکستان نے میچ کا آغاز اچھے انداز میں کیا اور پہلے ہاف میں انڈیا کے مقابلے میں بہتر کھیل پیش کیا۔ پاکستان شاہینز نے پہلے ہاف میں 65 فیصد وقت گیند اپنے قبضے میں رکھی، نو شاٹس لگائے جن میں سے چار ہدف پر تھے، جبکہ چار کارنرز بھی حاصل کیے۔ اس کے مقابلے میں انڈیا صرف تین شاٹس لگا سکا، جن میں سے ایک ہدف پر تھا۔
انڈیا نے صمد ارشد کو روکنے کے لیے ان کے خلاف دو کھلاڑیوں کو تعینات کیا، لیکن صمد اور حارث زیب نے دائیں جانب سے مل کر کئی اچھے حملے کیے۔ مڈفیلڈ میں عادل نبی نے بھی عمدہ مہارت کا مظاہرہ کرتے ہوئے انڈین کھلاڑیوں کو بارہا مات دی۔
انڈیا نے بھی پہلے ہاف میں گول کرنے کے چند اچھے مواقع بنائے، لیکن پاکستانی گول کیپر یوسف بٹ نے ایک زوردار کک پر شاندار سیو کرکے گیند کو جال میں جانے سے روک دیا۔
پہلے ہاف کے اختتام پر پاکستان نے برتری حاصل کرلی۔ ایک منٹ کے اضافی وقت میں شاہینز کو کارنر ملا۔ انڈیا نے گیند کو خطرے سے باہر نکال دیا، لیکن پاکستان نے ایک آخری حملہ کیا۔ بائیں جانب سے جنید شاہ کا کراس ایک انڈین کھلاڑی سے ٹکرا کر عالمگیر غازی کے سامنے آگیا، جنہوں نے خوبصورت شاٹ لگاتے ہوئے گیند کو گول کے اوپری کونے میں پہنچا دیا۔ اس طرح پاکستان نے 45+1ویں منٹ میں 1-0 کی برتری حاصل کرلی۔
دوسرے ہاف میں انڈیا نے زیادہ تیز کھیلنا شروع کیا اور پاکستان پر دباؤ بڑھا دیا۔
51ویں منٹ میں پی وی وشنو نے پاکستانی دفاع کو چکمہ دے کر شاٹ لگایا، لیکن یوسف بٹ نے اسے روک لیا۔ 54ویں منٹ میں علی اکبر نے بائیں جانب سے گول کرنے کی کوشش کی، تاہم انڈین گول کیپر نے ان کا شاٹ بھی بچا لیا۔
59ویں منٹ میں ویڈیو اسسٹنٹ ریفری (وی اے آر) کے جائزے کے بعد جنید شاہ کو برائسن فرنینڈس کے خلاف فاؤل پر براہ راست ریڈ کارڈ دکھا دیا گیا۔ اس فیصلے نے میچ کا رخ بدل دیا اور پاکستان کو باقی مقابلہ دس کھلاڑیوں کے ساتھ کھیلنا پڑا۔
پہلے ہاف میں پاکستان کے پاس گیند کا 65 فیصد قبضہ تھا (فوٹو: پی ایف ایف)
اعداد و شمار بھی میچ میں آنے والی اس تبدیلی کو واضح کرتے ہیں۔ پہلے ہاف میں پاکستان کے پاس گیند کا 65 فیصد قبضہ تھا، جو میچ کے اختتام تک کم ہوکر 49 فیصد رہ گیا، جبکہ انڈیا کا قبضہ 35 سے بڑھ کر 51 فیصد ہوگیا۔ انڈیا نے پہلے ہاف میں صرف تین شاٹس لگائے تھے، لیکن میچ کے اختتام تک یہ تعداد 11 ہوگئی۔ دونوں ٹیموں نے مجموعی طور پر 11، 11 شاٹس لگائے، جن میں سے انڈیا کے چھ اور پاکستان کے پانچ شاٹس ہدف پر تھے۔
ایک کھلاڑی کم ہونے کے بعد پاکستان کو زیادہ تر وقت اپنے دفاع میں گزارنا پڑا اور انڈیا نے اس صورتحال کا فائدہ اٹھایا۔
60ویں منٹ میں دائیں جانب سے آنے والے کراس پر سہیل بھٹ نے سائیڈ فٹ سے گیند کو جال میں پہنچا کر مقابلہ 1-1 سے برابر کردیا۔
67ویں منٹ میں یوسف بٹ نے وشنو کا ایک اور شاٹ روک کر پاکستان کو مقابلے میں برقرار رکھا۔
انڈیا نے حملے جاری رکھے اور 88ویں منٹ میں فیصلہ کن گول کردیا۔ کارنر پر سندیپ منڈی کو ہیڈر لگانے کا موقع ملا اور انہوں نے گیند کو یوسف بٹ کے پیچھے جال میں پہنچا کر انڈیا کو 2-1 کی برتری دلا دی۔
پانچ منٹ کے اضافی وقت میں پاکستان نے مقابلہ برابر کرنے کی کوشش کی، لیکن انڈیا اپنی برتری برقرار رکھنے میں کامیاب رہا اور ٹائٹل اپنے نام کرلیا۔