سعودی سرمایہ کاروں کا وفد پیر کو ایک ہفتے کے دورے پر اسلام آباد پہنچے گا

پاکستان میں جاری سی پیک منصوبوں اور سرمایہ کاری کے مواقع کا جائزہ لینے کے لیے سعودی سرمایہ کاروں کا ایک اعلیٰ سطح کا وفد سوموار کو اسلام آباد پہنچے گا۔ 

30 رکنی وفد اسلام آباد میں وفاقی وزرا، اعلی سرکاری وفاقی و صوبائی حکام، سی پیک کے متعلقہ حکام اور کاروباری افراد سے ملاقاتیں کرے گا۔ 

سعودی سفارت خانے کے مطابق سعودی سرمایہ کاروں کا وفد ایک ہفتے تک پاکستان میں قیام کرے گا۔ اس دوران وفد اسلام آباد، لاہور، کراچی اور فیصل آباد کا دورہ کرے گا۔

اسلام آباد میں سوموار کی شام وفد سی پیک کے متعلقہ حکام سے ملاقات کرے گا جس میں پاکستان میں سی پیک منصوبوں، ان پر ہونے والی پیشن رفت، ان میں سرمایہ کاری کے مواقع اور طریقہ کار سے متعلق تفصیلی بات چیت ہوگی۔

اسی روز وفد سے خیبرپختونخوا فوڈ سکیورٹی پروگرام کے متعلقہ حکام سے بھی ملاقات شیڈول ہے جس میں صوبے میں غذائی شعبے میں سرمایہ کاری، فوڈ پروسیسنگ اور ویلیو ایڈڈ مصنوعات پر تبادلہ خیال ہوگا۔ 

وفد پاکستان کے وفاقی وزیر تجارت سید نوید قمر اور وزیر منصوبہ بندی اور سرمایہ کاری احسن اقبال سے الگ الگ ملاقاتوں میں دو طرقہ تجارت کے فروغ، تاجروں کے لیے سہولیات، قوانین اور پاکستان میں سرمایہ کاری کے لیے موزوں شعبہ جات اور سیکٹرز پر تبادلہ خیال بھی کرے گا۔ 

اگلے روز سعودی سرمایہ کاروں کا وفد لاہور جائے گا جہاں لاہور چیمبر آف کامرس میں پاکستانی تاجروں سے ملاقات ہوگی، بعدازاں وفد کو  پنجاب سرمایہ کاری بورڈ کی جانب سے صوبے میں سرمایہ کاری سے متعلق بریفنگ دی جائے گی۔ 

وفد جمعے کو فیصل آباد کا دورہ کرے گا جہاں اس کے ارکان کی فیصل آباد چیمبر آف کامرس اینڈ انڈسٹری کے ارکان سے ملاقات طے ہے۔

اس ملاقات میں فیصل آباد میں صنعتوں اور ان میں سرمایہ کاری، تجارت اور باہمی دلچسپی کے امور زیر غور آئیں گے۔ سنیچر کو سعودی سرمایہ کاروں کا وفد کراچی پہنچے گا جہاں صوبائی حکام کے علاوہ  فیڈریشن آف پاکستان چیمبرز آف کامرس اینڈ انڈسٹری کا دورہ کرے گا اور تاجروں اور سرمایہ کاروں سے ملاقاتیں ہوں گی۔ 

موجودہ حکومت کے قیام کے بعد سعودی عرب سے سرمایہ کاروں کے اعلیٰ سطح کے وفد کا اپنی نوعیت کا یہ پہلا دورہ ہے جو وزیراعظم شہباز شریف کے دورہ سعودی عرب کے فالو اپ کے طور پر کیا جا رہا ہے۔ 

سعودی عرب کی جانب سے معاشی مشکلات میں پاکستان کو ہر ممکن تعاون کی یقین دہانی کرائی گئی ہے اور پاکستان میں تعینات سعودی سفیر نواف بن سعید المالکی نے دو روز قبل اردو نیوز کے ساتھ خصوصی بات چیت میں اس کا اشارہ بھی دیا تھا۔

ان کا کہنا تھا کہ ’ہم آنے والے دنوں میں پاکستان کو مستحکم، محفوظ اور بہتر حالت میں دیکھیں گے۔‘