دعا زہرا کو لاہور دارالامان منتقل کردیا گیا

کراچی سے اپنا گھر چھوڑ کر لاہور جاکر پسند کی شادی کرنے والی دعا زہرا دارالامان منتقل کردیا گیا ہے۔

منگل کو  دعا زہرا لاہور میں مجسٹریٹ کی عدالت میں پیش ہوئیں اور کہا کہ ان کی جان کو خطرہ ہے اس لیے انہیں دارالامان منتقل کیا جائے۔

عدالت نے دعا زہرہ کی درخواست پر ان کو دارالامان منتقل کرنے کا حکم دے دیا۔

پاکستان کے وزیر اعظم محمد شہباز شریف کے معاون خصوصی سلمان صوفی نے بتایا ہے کہ دعا زہرہ کو دارلامان میں منتقل کردیا گیا ہے۔

منگل کے روز سماجی رابطوں کی ویب سائٹ ٹوئٹر پر اپنے ٹویٹ میں سلمان صوفی نے کہا ہے دعا زہرہ کو پنجاب حکومت نے عدالت کے حکم کے بعد سخت سکیورٹی اور حفاظت میں دارلامان میں منتقل کردیا ہے۔

جبکہ سندھ حکومت سے درخواست کی گئی ہے کہ وہ چائلڈ پروٹیکشن بیورو کی ٹیم کو بھجییں تاکہ وہ دعا زہرہ کو اپنے والدین کے پاس لے کر جاسکیں۔

سلمان صوفی نے یہ بھی کہا ہے کہ دعا زہرہ کے شوہر ظہیر کو گرفتار کرنے کے لیے چھاپے مارے جارہے ہیں۔