انڈیا میں مسجد جیسے بس سٹاپ کی شکل بی جے پی کی دھمکی کے بعد تبدیل

انڈین ریاست کرناٹک کے شہر میسور میں مسجد کی طرح تعمیر کیے گئے ایک بس سٹاپ کا حلیہ بھارتیہ جنتا پارٹی (بی جے پی) کے ایک رکن اسمبلی کی دھمکی کے سبب تبدیل کر دیا گیا ہے۔

انڈین چینل ’این ڈی ٹی وی‘ کے مطابق میسور کی حدود میں واقع اس بس سٹاپ کی چھت پر تین سنہرے رنگ کے گنبد بنائے گئے تھے، لیکن بی جے پی کے رکن اسمبلی پراتاپ سمہا کی دھمکی کے بعد ان تین گنبدوں کو ہٹا کر ایک گنبد تعمیر کیا گیا ہے اور اس کا رنگ بھی تبدیل کر دیا گیا ہے۔

خیال رہے کچھ دنوں پہلے پراتاپ سمہا نے کہا تھا کہ انہوں نے انجینیئرز کو حکم دیا ہے کہ انہی کی پارٹی کے رکن کی جانب سے تعمیر کیے گئے ’مسجد کی طرح‘ دکھنے والے بس سٹاپ کو مسمار کردیا جائے۔

انہوں نے دھمکی دی تھی کہ اگر انجینیئرز کی جانب سے یہ بس سٹاپ دو سے تین دن میں مسمار نہیں کیا جاتا تو وہ اسے خود توڑ دیں گے۔

اتوار کو صبح ایک ٹویٹ میں پراتاپ سمہا نے اپنی بات کو دہراتے ہوئے لکھا کہ ’اگر بیچ میں ایک بڑا گنبد ہو اور سائیڈ پر دو چھوٹے گنبد ہوں تو یہ مسجد ہے۔‘

انہوں نے اپنی ٹویٹ میں ڈسٹرکٹ کلیکٹر کا بس سٹاپ کے ڈیزائن کو تبدیل کرنے پر شکریہ بھی ادا کیا۔