’لاہور دا پاوا،‘ سوشل میڈیا پر میمز میں شہباز شریف اور سپائیڈر مین کی انٹری

’لاہور دا پاوا، اختر لاوا‘ وہ نعرہ ہے جو پچھلے کئی دنوں سے سوشل میڈیا پر تواتر سے دکھائی دے رہا ہے اور اب اس ’لاوے‘ کی ویڈیو نے مختلف پلیٹ فارمز پر میمز کی شکلیں اختیار کر لی ہیں۔

بات آگے بڑھانے سے پہلے یہ جاننا ضروری ہے کہ ’لاہور دا پاوا، اختر لاوا‘ ہے کیا؟ اس کے لفظی معنی اگر نکالے جائیں تو اس کے پہلے مصرعے کا مطلب ’لاہور کا ستون‘ ہے اور دوسرا مصرع اس شخص کا نام ہے جس کی ویڈیو سوشل میڈیا پر وائرل ہوئی۔

پاکستان کے مقامی میڈیا پر چلنے والی اطلاعات کے مطابق نعرے لگانے والے اس شخص کا نام چوہدری اختر لاوا ہے اور یہ لاہور کے رہائشی ہیں۔

سوشل میڈیا خصوصاً ٹوئٹر پر اختر لاوا کا نعرہ وبائی شکل اختیار کر چکا ہے اور اب تو صارفین نے ایڈیٹنگ سکلز کے ذریعے پاکستان کے وزیراعظم شہباز شریف سے بھی اختر لاوا کے نعرے لگوانا شروع کر دیے ہیں۔

بات صرف پاکستان کے وزیراعظم پر ہی نہی رکی بلکہ سوشل میڈیا صارفین نے سُپر ہیرو سپائیڈر مین سے بھی ’لاہور دا پاوا، اختر لاوا‘ کا نعرہ لگوا دیا۔

ٹوئٹر پر ایک پیروڈی اکاؤنٹ ڈبلیو ڈبلیو ای کو بین الاقوامی ریسلر بل گولڈ برگ میں بھی اختر لاوا کی جھلک نظر آئی۔

سوشل میڈیا پر شیئر ہونے والی ایک میم میں مشہور زمانہ کارٹون بھی اپنے ارد گرد جمع ہوئے لڑکیوں کے درمیان اختر لاوا کا ہی نعرہ لگاتے ہوئے نظر آئے۔

ایک صارف کی جانب سے شیئر کی گئی ویڈیو میں انڈین فلم ’گول مال‘ کے ایک سین میں تمام افراد اختر لاوا کے نعرے لگنے سے پریشان دکھائی دیے۔