’میں آپ کی نوکرانی نہیں ہوں‘ ، مسافر کے توہین آمیز رویے پر انڈین ائیرہوسٹس برس پڑیں

سوشل میڈیا پر ایک ویڈیو وائرل ہے جس میں ایک ائیر ہوسٹس اور جہاز کے مسافر کے درمیان سخت مکالمہ ہو رہا ہے۔

اخبار ’انڈین ایکسپریس‘ کے مطابق یہ واقعہ استنبول سے نئی دہلی کی پرواز میں پیش آیا۔

اس ویڈیو کے سوشل میڈیا پر وائرل ہونے کے بعد فضائی کمپنی ’انڈیگو‘ کے سی ای او نے بدھ کو اپنی ائیرہوسٹس کی حمایت کی جسے ویڈیو میں مسافر کے ساتھ تند و تیز گفتگو کرتے دیکھا جا سکتا ہے۔

’انڈیگو‘ کے سربراہ نے اپنے ٹوئٹر اکاؤنٹ پر لکھا کہ ’جیسا کہ میں پہلے کہہ چکا ہوں کہ جہاز کے عملے کے افراد بھی انسان ہوتے ہیں۔ ان (ائیرہوسٹس کے) اس درجہ طیش میں آنے کی کوئی تو  وجہ ہو گی۔‘

’میں گزشتہ برسوں میں عملے کے افراد کو مسافروں کی جانب سے پِٹتے اور بدکلامی کا سامنا کرتے دیکھا ہے۔‘

’امید ہے کہ وہ (ائیرہوسٹس) اس دباؤ کے باوجود عافیت سے ہوں گی۔‘

یہ رواں ماہ کی 16 تاریخ کا واقعہ ہے جب ایک مسافر نے فلائٹ کے کھانے سے متعلق شکایت کی اور وہ ایک ائیرہوسٹس پر برس پڑا جو اسے پرواز کے دوران دیے جانے والے کھانے کے ضوابط کے بارے میں بتانے کی کوشش کر رہی تھیں۔

مسافر غصے میں مسلسل اونچی آواز میں بول رہا تھا جس کے بعد ائیر ہوسٹس بھی غصے میں آ گئیں۔

ویڈیو میں کیا ہے؟

ویڈیو میں مسافر کا چہرہ دکھائی نہیں رہا۔ وہاں ایک ائیر ہوسٹس مسافر سے کہتی ہے ’آپ کی وجہ سے میری ساتھی کو رونا پڑا‘ ۔ اس کے بعد دونوں جانب سے بحث شروع ہوئی اور مسافر نے اونچی آواز میں کہا ’آپ چِلّا کیوں رہی ہیں؟ چِلّاؤ مت۔‘

اس پر ائیر ہوسٹس جواب دیتی ہے ’میں اس کی وجہ سے چِلّا رہی ہوں جو آپ نے کیا۔‘ اس کے بعد مسافر کہتا ہے ’خاموش ہو جاؤ‘ ۔ جواب میں ائیر ہوسٹس چیخ کر کہتی ہے ’تم خاموش ہو جاؤ۔‘

اس دوران ایک اور ائیر ہوسٹس صورت حال کو سنبھالنے کی کوشش کرتی دکھائی دیتی ہے۔

پھر وہی ایئر ہوسٹس مسافر سے مخاطب ہو کر کہتی ہے ’معذرت کے ساتھ، آپ سٹاف کے ساتھ اس انداز میں بات نہیں کر سکتے۔ میں آپ کو مکمل احترام سے سن رہی ہوں۔ ہم عملے کے افراد ہیں آپ کے نوکر نہیں ہیں۔‘

اس واقعے کے بعد فضائی کمپنی ’انڈیگو‘ نے کہا کہ یہ واقعہ فلائٹ 12 6ای میں پیش آیا ’جس کی وجہ بعض مسافروں کی جانب سے چنا گیا کھانا تھا۔‘

فضائی کمپنی نے اپنے بیان میں مزید کہا کہ ’ہمیں اپنے عملے کی ضروریات کا علم ہے اور ہماری ہمیشہ کوشش ہوتی ہے کہ سفر خوشگوار رہے۔‘

’ہم واقعے کی تحقیق کر رہے ہیں لیکن یہ یقین دلاتے ہیں مسافروں کی راحت ہماری اولین ترجیح ہے۔‘