رنویر سنگھ کی ’فلم سرکس سے بہتر ہے میلے والی سرکس‘

بالی وُڈ کے اداکار رنویر سنگھ کی نئی فلم ’سرکس‘ اپنی ریلیز کے پہلے ہی دن بری طرح ناکام ہو گئی ہے۔

کرسمس سے دو دن قبل ریلیز ہونے والی اس فلم کو انٹرنیٹ پر بوریت سے بھرپور اور پرانی طرز کی کہا جا رہا ہے۔

فلم کی کہانی سرکس میں بجلی کی تاروں سے کرتب دکھانے والے آرٹسٹ کے گرد گھومتی ہے جس کے جسم میں کرنٹ بھرا ہوا ہے۔

’سرکس‘ کے ہدایت کار روہت شیٹھی ہیں جبکہ کاسٹ میں رنویر سنگھ، پوجا ہیگڑے، جیکولین فرنینڈس، جونی لیور، ورون شرما، سنجے مشرا اور سدھارتھ جادھو شامل ہیں۔

فلم میں رنویر سنگھ کی اہلیہ دیپکا پاڈوکون کا کیمیو رول بھی شامل کیا گیا ہے۔

اتنی بڑی کاسٹ اور روہت شیٹھی کی فرنچائز ہونے کے باوجود فلم اپنے معیار پر پورا نہیں اتری اور اپنی ریلیز کے پہلے دن ہی فلم ناقدین سمیت شائقین کو پسند نہیں آئی۔

دلچسپ بات یہ ہے کہ اگر یہ فلم باکس آفس پر ناکام ہوتی ہے تو یہ رنویر سنگھ کی لگاتار تیسری فلاپ فلم ہو گی۔

اس سے پہلے رنویر سنگھ کی ’جیش بھائی جوردار‘ اور ’83‘ بری طرح ناکام ہوئی تھیں۔

سماجی رابطوں کی ویب سائٹ ٹوئٹر پر بھی ناقدین کی جانب سے اس فلم کے حوالے سے تبصرے دیکھنے میں آ رہے ہیں۔

معروف فلم ناقد ترن آدرش نے فلم کو ’پرانی طرز‘ کی کہہ کر صرف دو سٹار دیے اور مزید کہا کہ ’اس میں تفریحی اور مزاح نہیں ہے جو روہت شیٹھی کے ساتھ وابستہ ہوتا ہے، اس میں کچھ مزاحیہ لمحات ہیں لیکن چنگاری نہیں ہے۔‘

صحافی فریدون شہریار نے اپنی ٹویٹ میں کہا کہ ’سرکس کے بارے میں ریویو لکھے جا رہے ہیں لیکن میرا جائزہ یہ ہے کہ یہ ایک بہت بُری فلم ہے اور اس میں تفریحی بالکل ہی نہیں ہے۔ عام سے روہت شیٹھی اب مغرور اور خود پسند ہو گئے ہیں۔کہانی بہت بیکار تھی اور یہ حیران کن بھی نہیں تھا، ناظرین کو بیوقوف مت سمجھیں۔‘

صحافی امیت بھاٹیا نے کہا کہ ’یہ روہت شیٹھی کی سب سے کمزور فلم ہے اور بوریت سے بھرپور ہے۔ جیسی ہمیں روہت شیٹھی سے امیدیں ہوتی ہیں ویسی بالکل بھی نہیں ہے۔ آپ کو کم ہی ہنسی آئے گی، اس سے بہتر ہے میلے میں لگنے والی سرکس دیکھ لیں۔‘

فلم رائٹر راہول دیسائی کا کہنا تھا کہ ’میں جب بھی اپنی زندگی کے بارے میں تھوڑا سا پُرامید ہوتا ہوں تب روہت شیٹھی کی فلم آ جاتی ہے۔ یہ روہت شیٹھی کی احمقانہ فلم ہے، رنویر سنگھ اس سے بھی زیادہ احمق لگ رہے ہیں۔‘