Sorry, you need to enable JavaScript to visit this website.

پی ایس ایل میں پہلی ففٹی، ’20 سالہ صائم ایوب تو بڑے پلیئر لگ رہے ہیں‘

صائم ایوب نے پاکستان کپ میں سندھ کی جانب سے 10 میچز میں 461 رنز بنائے۔ فوٹو: پی ایس ایل ٹوئٹر
پاکستان سپر لیگ (پی ایس ایل) کے آٹھویں سیزن کے میچ میں پشاور زلمی کے بیٹر صائم ایوب نے ملتان سلطانز کے خلاف اپنے پی ایس ایل کیریئر کی پہلی ففٹی بنا ڈالی۔
صائم ایوب نے 37 گیندوں پر 3 چوکوں اور 3 چھکوں کی مدد سے 53 رنز بنائے۔
بائیں ہاتھ کے بیٹر نے اپنی اننگز میں دلکش شاٹس کھیلے جس میں اُن کا سب سے خاص شاٹ ساتویں اوور کی پہلی گیند پر دیکھنے کو ملا جب انہوں نے فاسٹ بولر عباس آفریدی کو فائن لیگ پر چھکا مارا۔
20 سالہ صائم ایوب کا تعلق صوبہ سندھ کے دارالحکومت کراچی ہے۔
سنہ 2021 میں ہونے والے پی ایس ایل کے ایڈیشن میں کوئٹہ گلیڈی ایٹرز نے انہیں اپنی ٹیم میں شامل کیا جس کے بعد انہوں نے کوئٹہ کے لیے سات میچز کھیل کر 117 رنز بنائے۔
 اس سے اگلے برس 2022 میں انہوں نے ڈومیسٹک ون ڈے ٹورنامنٹ پاکستان کپ میں سندھ کی نمائندگی کی۔
پاکستان کپ میں انہوں نے سندھ کی جانب سے 10 میچز میں 46 کی اوسط سے 461 رنز بنائے جس میں دو سینچریاں اور دو ففٹیز بھی شامل تھیں۔
اس ٹورنامنٹ میں صائم ایوب زیادہ رنز بنانے والے تیسرے بیٹر تھے۔
پاکستان کے فرسٹ کلاس ٹورنامنٹ قائد اعظم ٹرافی میں بھی سندھ کی نمائندگی کرتے ہوئے انہوں نے 10 میچز کھیل کر 516 رنز بنائے ہیں۔
رواں سال کے سیزن کے لیے انہیں پشاور زلمی نے وائلڈ کارڈ کو استعمال کرتے ہوئے سِلور کیٹیگری میں اپنی ٹیم میں خریدا تھا۔
صائم ایوب کی پی ایس ایل میں پہلی ففٹی پر انہیں سماجی رابطوں کی ویب سائٹ ٹوئٹر پر بھی خوب سراہا جا رہا ہے۔
کرکٹ کی کوریج کرنے والی ویب سائٹ کرک انفو نے اپنی ٹویٹ میں لکھا ’اس چھکے کا انتظار کریں جس کی طرف صائم نے نہیں دیکھا، 20 سالہ صائم ایوب تو سچ میں بڑے پلیئر لگ رہے ہیں۔‘
عبداللہ لکھتے ہیں کہ ’یہ دن، ہفتے، مہینے اور سال کی بہترین شاٹ ہے۔ صائم ایوب کیا ٹیلنٹ ہے یار۔‘
فیڈاٹو نامی ایک ہینڈل کہتے ہیں کہ ’صائم ایوب واقعی سلجھا ہوا ٹیلنٹ ہے۔ پی ایس ایل نے مشکل سے ہی ایسے دلکش بیٹر پیدا کیے ہیں۔ یہ مستقبل ہیں۔‘
حجاب زاہد نے اپنی ٹویٹ میں تبصرہ کیا کہ ’صائم ایوب کو بیٹنگ کرتے دیکھا ایک اعزاز ہے۔‘
 

شیئر: