پشاور زلمی کے خلاف عمدہ بولنگ، حسن علی کی ٹی20 میں 200 وکٹیں

پاکستان سپر لیگ (پی ایس ایل) کی ٹیم اسلام آباد یونائیٹڈ کے فاسٹ بولر حسن علی نے اپنے ٹی20 کیریئر میں 200 وکٹیں حاصل کر لی ہیں۔

جمعرات کو پشاور زلمی کے خلاف میچ میں حسن علی نے چار اوورز میں 35 رنز دے کر تین وکٹیں حاصل کیں جس کے بعد ٹی20 کرکٹ میں ان کی وکٹوں کی تعداد 200 ہوگئی۔
حسن علی کے سپیل سے قبل پشاور زلمی کے بیٹرز میچ میں حاوی تھے تاہم فاسٹ بولر نے 10ویں اوور میں ٹام کوہلر کیڈ مور اور روؤمان پاول کو آؤٹ کیا جس کے بعد ان کی ٹیم کی میچ میں پوزیشن مستحکم ہوگئی۔

فاسٹ بولر نے 2016 میں اپنے پی ایس ایل کیریئر کا آغاز پشاور زلمی کی جانب سے کیا تھا جہاں انہوں نے 45 میچز میں 59 کھلاڑیوں کو آؤٹ کیا۔
اس کے بعد 2020 میں انہیں اسلام آباد یونائیٹڈ نے اپنا حصہ بنا لیا۔ یونائیٹڈ کی جانب سے وہ اب تک 21 میچ کھیل کر 28 بیٹرز کو پویلین کی راہ دکھا چکے ہیں۔
دوسری جانب 28 سالہ حسن علی نے اب تک پاکستان کرکٹ ٹیم کی نمائندگی کرتے ہوئے 50 ٹی20 میچز کھیل کر 60 شکار کیے ہیں۔
واضح رہے حسن علی نے انٹرنیشنل، فرنچائز اور ڈومیسٹک کرکٹ میں کل 156 میچز کھیل کر 200 وکٹیں حاصل اپنے نام کی ہیں۔
حسن علی کی فارم میں واپسی پر سماجی رابطوں کی ویب سائٹ ٹوئٹر پر شائقین میں خوشی کی لہر دوڑ گئی ہے۔
اسلام آباد یونائیٹڈ نے اپنی ٹویٹ میں حسن علی کو خوش آمدید کہتے ہوئے کہا کہ ’ایک یادگار سپیل، خوش آمدید حسن علی۔‘

جاسر شہباز ان کی تعریف کرتے ہوئے تبصرہ کرتے ہیں کہ ’حسن علی ایک نفیس کھلاڑی رہے ہیں، جب فارم سے باہر تھے تو عاجز رہے، محنت کرتے رہے اور دوسروں کی خوشیوں میں شریک ہوتے رہے۔ انہیں دوبارہ وکٹیں لیتا دیکھ کر خوشی ہو رہی ہے۔‘

سلیمان رضا نے لکھا کہ ’حسن علی واپس آگئے ہیں اور ان کے ساتھ اسلام آباد بھی بہتر پوزیشن میں آگیا ہے۔‘

فاطمہ مسرور نے 2017 میں کھیلی گئی چیمپیئنز ٹرافی میں حسن علی کی کیریئر کی بہترین فارم کی یاد تازہ کرتے ہوئے کہا کہ ’جب آپ کو وکٹ کی ضرورت ہو تو حسن علی کے پاس جاؤ، آج کا پیارا سپیل۔‘