جلد سیاست میں قدم رکھونگا، رجنی کانت

ممبئی .... تامل فلموں کے سپر اسٹار رجنی کانت نے واضح اشارہ دیا کہ وہ جلد ہی سیاست میں قدم رکھیں گے۔ تاہم انہوںنے یہ بھی صاف کر دیا کہ وہ تمل ناڈو کی دونوں اہم جماعتوں ڈی ایم کے اور انا ڈی ایم کے کی بجائے کسی تیسری پارٹی کے ساتھ سیاست کریں گے اور ریاست کو ایک نیا متبادل دیں گے۔ رجنی کانت کے سیاست میں داخل ہونے پر جاری قیاس آرائیوں کے درمیان انہوں نے پانچ روزہ ضلع سطح کے فوٹو سیشن کے آخری دن اپنے مداحوں کے ساتھ تصویر یں کھینچواتے ہوئے اپنے سیاسی تیور دکھائے۔انہوں نے ڈائیلاگ بولا کہ”جب جنگ ہوگا تو دیکھا جائے گا۔ تب تک ہمیں صبر کرنا چاہئے“۔ رجنی کانت نے کہا کہ وہ سیاست کے بارے میں کچھ بھی کہتے ہیں تو وہ بحث کا موضوع بن جاتا ہے۔انہوں نے کہاکہ "میں نے کبھی نہیں چاہا کہ میرے سیاسی تبصرے کوئی تنازعہ پیدا کریں"۔ انہوں نے کہا کہ کوئی بھی بغیر اپوزیشن کے خاص طور پر سیاست میں بڑا نہیں بن سکتا۔ انہوں نے کہاکہ”تملوں نے مجھے یہ زندگی دی ہے۔ کیا مجھے سیاست میں اس لئے نہیں آنا چاہئے تاکہ وہ خوش رہیں اور خوشحال زندگی جی سکیں“۔ رجنی کانت نے دراویڈا منترا کڑاگھم (ڈی ایم کے) کے ایگزیکٹو چیئرمین ایم کے اسٹالن کو بہترین سیاستدان قرار دیتے ہوئے کہا کہ وہ ایک موثر ایڈمنسٹریٹر بھی ہیں۔اگر انہیں اختیار دیا جائے تو وہ بہتر کام کر سکیں گے۔