بابر اعظم کو ’کرکٹ ٹیم کا سلمان خان‘ کیوں کہا جا رہا ہے؟

پاکستان کرکٹ ٹیم تین ٹیسٹ میچوں کی سیریز کے لیے کپتان شان مسعود کی قیادت میں آسٹریلیا روانہ ہوگئی ہے۔

دورہ آسٹریلیا کے لیے پاکستان کرکٹ ٹیم کا ٹریننگ کیمپ 22 سے 28 نومبر تک راولپنڈی میں منعقد کیا تھا جس کے بعد ٹیم نے لاہور سے آسٹریلیا کے لیے بدھ کی شب اڑان بھری۔

پاکستان اور آسٹریلیا کے درمیان تین ٹیسٹ میچوں پر مشتمل سیریز کا پہلا میچ 14 دسمبر کو پرتھ میں کھیلا جائے گا جبکہ سیریز کا دوسرا میچ باکسنگ ڈے یعنی 26 دسمبر کو میلبرن اور تیسرا میچ 3 جنوری کو سڈنی میں کھیلا جائے گا۔

دوسری جانب گرین شرٹس کے کھلاڑیوں کی ویڈیو سماجی رابطوں کی ویب سائٹ ایکس (ٹوئٹر) پر وائرل ہے جس میں کچھ کھلاڑیوں کو آسٹریلیا روانگی سے قبل اپنے اہلخانہ کے ساتھ دیکھا جا سکتا ہے۔

اس ویڈیو میں شاہین شاہ آفریدی، امام الحق، کپتان شان مسعود اور ٹیم ڈائریکٹر محمد حفیظ کو اپنی اہلیہ کے ساتھ دیکھا گیا۔

اسی دوران ویڈیو میں سپرسٹار بابر اعظم بھی نظر آئے جو اکیلے سامان اٹھائے جاتے ہوئے دکھائی دیے۔

اس ویڈیو کے وائرل ہونے کے بعد ٹوئٹر صارفین کو بالی وُڈ کے میگا سٹار سلمان خان کی یاد ستانا شروع ہوگئی ہے۔

سلمان خان بھی اکثر و بیشتر ایوارڈ شوز میں اکیلے ہی نظر آتے ہیں جس کے باعث اُن پر بہت سی میمز بنائی جاتی ہیں۔

اسی سلسلے میں جمرز نامی ایک صارف نے اپنی ٹویٹ میں لکھا کہ ’بابر اعظم سلمان خان جیسا لیجنڈری مومنٹ بنا رہے ہیں (یعنی سلمان خان کی طرح اکیلے جا رہے ہیں)۔‘
 

جاوی نے اپنی ٹویٹ میں لکھا کہ ’سلمان خان کون؟ میں تو صرف بابر اعظم کو جانتا ہوں۔‘
 

عبدالرحمان ٹویٹ کرتے ہوئے لکھتے ہیں کہ ’بھائی کو پریشان ہونے کی ضرورت نہیں ہے۔ بابر کا ٹائم بھی آ جائے گا۔‘
 

ابو تراب تبصرہ کرتے ہوئے کہتے ہیں کہ ’ہمارا بادشاہ ملکہ کے بغیر۔‘
 

ایک اور صارف طوبیٰ بٹ نے لکھا کہ ’ہمارے بابر بھائی پاکستان کرکٹ ٹیم کے سلمان خان ہیں۔‘