’پاکستان سموکنگ لیگ‘، پی ایس ایل 9 فائنل کے وائرل ہونے والے لمحات

پاکستان سپر لیگ 9 کے فائنل میں اسلام آباد یونائیٹڈ نے ملتان سلطانز کو شکست دے کر تیسری بار ٹائٹل اپنے نام کر لیا ہے۔

18 فروری کو کراچی نیشنل سٹیڈیم میں دونوں ٹیموں کے درمیان سنسنی خیز مقابلہ دیکھنے کو ملا جس میں ملتان سلطانز کا 160 رنز کا ہدف اسلام آباد یونائیٹڈ نے آخری اوور میں آٹھ وکٹوں کے نقصان پر حاصل کیا۔

پی ایس ایل 9 کے اختتام کے بعد بہت سے لمحات شائقین کی توجہ کا مرکز بنے ہوئے ہیں اور تمام سوشل میڈیا پلیٹ فارمز پر صرف کرکٹ کا ہی چرچہ ہے۔

سماجی رابطے کی ویب سائٹ ایکس (سابق ٹوئٹر) پر ٹرینڈز میں اس وقت شاداب خان کی وائرل ویڈیوز سرفہرست ہیں جن میں وہ میچ کے بعد گراؤنڈ میں اپنی اہلیہ اور والدہ سے ملاقات کر رہے ہیں۔

ویڈیو میں دیکھا جا سکتا ہے شاداب کی اہلیہ پر مسرت انداز میں آگے بڑھ کر اپنے شوہر سے مل رہی ہیں اور اس کے بعد شاداب سامنے موجود اپنی والدہ کی طرف بڑھتے ہیں اور اپنا میڈل اتار کر ان کو پہنا دیتے ہیں۔

سوشل میڈیا صارف نے ویڈیو پوسٹ کرتے ہوئے کیپشن میں لکھا ’شاداب خان اپنی زندگی میں جیت گئے۔‘

ایک اور وائرل ویڈیو میں دیکھا گیا کہ اسلام آباد یونائیٹڈ کا حصہ بننے والے تین بھائی نسیم، حنین اور عبید شاہ میچ ختم ہونے کے بعد اپنے والد کو کرسی پر بٹھا کر ان کے گرد کھڑے ہیں۔

حال ہی میں تینوں بھائیوں کے والد ظفر شاہ نے میچ کے بعد انٹرویو دیتے ہوئے اپنی خوشی کا اظہار بھی کیا ہے۔ ان کا کہنا تھا کہ ’میرے بچوں نے میرا اور پاکستان کا سر فخر سے بلند کیا، کبھی نہیں سوچا نہیں تھا کہ تینوں بیٹے قومی سطح پر کرکٹ کھیلیں گے۔‘

علاوہ ازیں پی ایس ایل فائنل کے بعد ٹاپ ٹرینڈنگ ویڈیوز میں اسلام آباد یونائیٹڈ کے جشن منانے کی ویڈیو بھی شامل ہے جس میں دیکھا گیا کہ ٹیم کے کھلاڑی فائنل میں فتح کے بعد گراؤنڈ کا چکر لگا رہے ہیں اور انہوں نے اظہار یکجہتی کے طور پر فلسطین کے جھنڈے اٹھا رکھے ہیں۔ اس پر بات کرتے ہوئے شاداب خان نے کہا کہ فلسطین سے اظہار یکجہتی اہم تھی، یہ ہم سب کا مشترکہ پلان تھا۔

پی ایس ایل 9 فائنل میں کرکٹ شائقین کی توجہ کا مرکز بننے والے عماد وسیم بھی سوشل میڈیا پر خوب وائرل ہو رہے ہیں اور اس کی وجہ ان کی شاندار پرفارمنس ہی نہیں بلکہ کچھ اور بھی ہے۔ 

میچ کے دوران دیکھا گیا کہ عماد نے پانچ وکٹیں حاصل کیں اور بریک لے کر ڈریسنگ روم گئے جہاں انہیں کیمرے پر سگریٹ پیتے ہوئے دیکھا گیا۔ 

سوشل میڈیا صارف نے ویڈیو شیئر کرتے ہوئے پوسٹ میں کہا کہ ’پاکستان سموکنگ لیگ۔‘

عماد وسیم کی ویڈیو وائرل ہونے کے بعد انہیں سوشل میڈیا پر کافی تنقید کا نشانہ بھی بنایا گیا۔

میچ کے اختتام پر جب تمام کھلاڑی گراؤنڈ میں اپنی فیملیز کے ہمراہ موجود تھے، عماد وسیم نے اپنی بیٹی کو گود میں اٹھا رکھا تھا اور انہوں نے پھر دوبارہ سے شائقین کی طرف دیکھتے ہوئے سگریٹ پینے کا ایکشن کیا۔

فاتح ٹیم اسلام آباد یونائیٹڈ کو کتنی انعامی رقم ملی؟

پی ایس ایل 9 کی ٹرافی کیساتھ ہی ساتھ اسلام آباد یونائیٹڈ کو بھاری انعامی رقم بھی دی گئی ہے۔ 

اسلام آباد یونائیٹڈ کو 14 کروڑ روپے کی انعامی رقم ملی جبکہ رنر اپ ٹیم ملتان سلطانز کو 5 کروڑ 60 لاکھ ملے۔