سعودی وزیر خارجہ شہزادہ فیصل بن فرحان کی سربراہی میں عرب وزارتی وفد نے جمعے کو پیرس میں فرانس کے صدر ایمانوئل میکخواں سے ملاقات کی ہے۔
سرکاری خبر رساں ایجنسی ایس پی اے کے مطابق شہزادہ فیصل بن فرحان کے علاوہ قطری وزیر اعظم و وزیرخارجہ شیخ محمد بن عبدالرحمن جاسم آل ثانی، اردن کے نائب وزیراعظم و وزیرخارجہ ایمن الصفدی اور مصری وزیرخارجہ سامع شکری بھی موجود تھے۔
ملاقات میں غزہ میں جاری اسرائیلی جارحیت سے پیدا ہونے والی صورتحال اور مکمل جنگ بندی کے لیے بین الاقوامی کوششوں کو تیز کرنے کی ضرورت پر تبادلہ خیال کیا گیا۔
فریقین نے شہریوں کے تحفظ کو یقینی بنانے،غزہ کے تمام حصوں میں مناسب اور پائیدار انسانی امداد کی فراہمی یقینی بنانے پر بھی بات چیت کی۔
انہوں نے ایک آزاد فلسطینی ریاست کی ضرورت کا اعادہ کیا اور کہا عالمی برادری اسرائیل کو فلسطینی علاقوں میں اس کے اقدامات کے لیے جوابدہ ٹہرائے۔
