نو مئی کو دھول اُڑانے والے آج دھول بٹھانے کی باتیں کر رہے ہیں: وزیر اطلاعات

یہ صفحہ اب مزید اپ ڈیٹ نہیں کیا جا رہا۔ 

اہم نکات:

• جناح ہاؤس حملہ کیس، جے آئی ٹی کی تفتیش میں تحریک انصاف کےآٹھ رہنما بےقصور قرار

• حکومت کے ساتھ مذاکرات آج سے شروع نہیں ہو رہے: بیرسٹر گوہر علی خان

• سابق جج مظاہرعلی نقوی کی جوڈیشل کونسل کے شوکاز نوٹس کے خلاف درخواست خارج

• سینیٹر اعجاز چوہدری کے پروڈکشن آرڈر کے لیے خط سینیٹ سیکرٹریٹ میں جمع

نو مئی کو دھول اُڑانے والے آج دھول بٹھانے کی باتیں کر رہے ہیں: وزیر اطلاعات

وفاقی وزیر اطلاعات عطاءاللہ تارڑ نے بیرسٹر گوہر کے بیان پر ردعمل دیتے ہوئے کہا ہے کہ ’نو مئی کو دھول اڑانے والے آج دھول بٹھانے کی باتیں کر رہے ہیں۔‘

انہوں نے کہا کہ ’تحریک انتشار گولی چلنے کا جھوٹا بیانیہ بنا رہی ہے۔ گولی چلی ہے تو ثبوت سامنے کیوں نہیں لاتے؟‘

عطا اللہ تارڑ نے کہا کہ ’غلیلوں، بنٹوں، پتھروں، سٹن گنز اور آتشیں اسلحے سے لیس شرپسندوں نے 26 نومبر کو وفاق پر چڑھائی کی۔‘

ان کا مزید کہنا تھا کہ ’پُرتشدد سیاست اور پرتشدد احتجاج پی ٹی آئی کا وطیرہ ہے۔ اپنے اوپر اُٹھنے والے سوالات کا جواب دیں، الزامات لگا کر ان سے منہ مت پھیریں۔‘

جناح ہاؤس حملہ کیس، تحریک انصاف کے آٹھ رہنما بےقصور قرار

جوائنٹ انویسٹی گیشن ٹیم (جے آئی ٹی) نے جناح ہاؤس حملہ کیس اور جلاؤ گھیراؤ کے مقدمے میں تحریک انصاف کے 8 رہنماؤں کو بےقصور قرار دے دیا ہے۔

لاہور کی انسداد دہشت گردی کی عدالت ایڈمن جی منظر علی گل نے  جناح ہاؤس حملہ اور جلاؤ گھیراؤ کے کیس کی سماعت کی۔

جے آئی ٹی نے دورانِ تفتیش جن خواتین سمیت پی ٹی آئی کے آٹھ رہنماؤں کو بےقصور قرار دیا ہے اُن میں توصیف خانم، سعدیہ ایوب، ثروت شاہد، نادرہ عمر، وحید الرحمان، ساجد پرنس، محمد بلال، فرحانہ فاروق شامل ہیں۔

ملزمان کے وکلا کی عبوری ضمانت واپس لینے کی استدعا پر عدالت نے ضمانت کی درخواستوں کو خارج کر دیا۔

پراسیکیوشن کی جانب سے بتایا گیا کہ حسان نیازی کی بہن حاجرہ نیازی، فاطمہ حیدر، بینا ذیشان اور رخسانہ نوید سے تفتیش جاری ہے۔

عدالت نے حاجرہ نیازی سمیت دیگر کی عبوری ضمانت میں 15 جنوری تک توسیع کر دی۔

حکومت کے ساتھ مذاکرات آج سے شروع نہیں ہو رہے: بیرسٹر گوہر

پاکستان تحریک انصاف کے چیئرمین بیرسٹر گوہر علی خان نے حکومت سے آج مذاکرات کی تردید کر دی۔

بیرسٹر گوہر علی خان نے صحافیوں سے گفتگو میں بتایا کہ ’مذاکرات آج سے باضابطہ طور پر شروع نہیں ہو رہے۔ ہم کوشش کررہے ہیں جو کمیٹی بنائی ہے اس کے طریقۂ کار پر عملدرآمد ہونا چاہیے۔‘

انہوں نے کہا کہ ’ہم چاہتے ہیں مذاکرات ہوں اور کسی حل تک پہنچ جائیں۔ سیاسی مسائل کا حل سیاسی ہونا چاہیے۔‘

موبائل فون بلوں کے ذریعے ایڈوانس ٹیکس، 338 ارب وصول

وزارت خزانہ نے موبائل فون بلوں کے ذریعے ایڈوانس ٹیکس وصولی کی تفصیلات قومی اسمبلی میں پیش کر دی ہیں۔

دستاویز کے مطابق گزشتہ پانچ برسوں کے دوران موبائل فون بلوں کے ذریعے ایڈوانس ٹیکس کی مد میں تین کھرب 38 ارب روپے جمع کیے گئے۔

وزارت خزانہ کے مطابق صارفین سے 2020 میں 50ارب،2021 میں 55 ارب ایڈوانس ٹیکس کی مد میں لیے گئے۔

2022 میں 61 ارب،2023 میں 80 ارب موبائل صارفین سے ٹیکس وصول کیا گیا۔ گزشتہ مالی سال کے دوران صارفین سے ایڈوانس ٹیکس کی مد میں 92 ارب روپوں کی وصولی کی گئی۔

شہباز شریف کہہ رہے ہیں مہنگائی کم ہو گئی، کس کو بیوقوف بنا رہے ہیں: عمر ایوب

اپوزیشن لیڈر عمر ایوب خان کا کہنا ہے کہ ’شہباز شریف اور ان کے وزیر کہہ رہے ہیں مہنگائی کم ہو گئی ہے۔ حکومت کس کو بیوقوف بنا رہی ہے؟‘

قومی اسمبلی کے اجلاس میں اظہارِخیال کرتے ہوئے اپوزیشن لیڈر عمر ایوب نے کہا کہ ’یہاں یہ اقتصادی سروے کی تفصیلات کٹ پیسٹ کر کے ایوان میں پیش کر دیتے ہیں۔ یہ کون سی دنیا میں رہتے ہیں ؟ 

انہوں نے کہا کہ ’اکنامک سروے سے جواب کاپی کیا گیا ہے، کیا وزارت کا یہی کام رہ گیا ہے؟ مہنگائی کم ہونے کی بجائے بڑھ رہی ہے۔‘

عمر ایوب نے کہا کہ ’جب احتجاج پر سرِعام گولیاں برسائی جائیں گی تو دنیا یہاں کے بارے میں کیا پیغام لے گی۔‘

انہوں نے مزید کہا کہ سید خورشید شاہ کی سربراہی میں بننے والی پارلیمانی کمیٹی کا اجلاس فوری بلایا جائے۔ پارلیمانی کمیٹی میں اسلام آباد احتجاج کا معاملہ زیر بحث لایا جائے۔‘

سینیٹر اعجاز چوہدری کے پروڈکشن آرڈرز کے لیے چیئرمین سینیٹ کو خط

سینیٹر اعجاز چوہدری کے پروڈکشن آرڈر کے لیے خط سینیٹ سیکرٹریٹ میں جمع کروا دیا گیا ہے۔ 

چیئرمین سینیٹ کو لکھے گئے خط میں کہا گیا ہے کہ ’اعجاز چوہدری سینیٹ کے ممبر ہیں جنہیں ڈیڑھ سال سے کسی اجلاس میں پیش نہیں کیا گیا۔‘

اعجاز چوہدری نے وکیل بابر اعوان کے توسط سے سینیٹ سیکریٹریٹ میں خط جمع کرایا ہے جس میں چیئرمین سینیٹ کو پروڈکشن آرڈر جاری کرنے کا کہا گیا ہے۔

سابق جج مظاہر علی نقوی کی شوکاز کے خلاف درخواست خارج

سپریم کورٹ کے آئینی بینچ نے سابق جج مظاہر علی نقوی کی جوڈیشل کونسل کے شوکاز نوٹس کے خلاف درخواست خارج کر دی ہے۔

مظاہر علی نقوی کی جوڈیشل کونسل کے خلاف درخواست پر سماعت 7 رکنی آئینی بینچ نے کی۔

سماعت کے دوران مظاہر علی نقوی کے وکیل نے موقف اپنایا کہ ’میرا اپنے مؤکل سے رابطہ نہیں ہو سکا، عدالت موکل سے رابطے اور ہدایات کے لیے مہلت دے۔‘

جسٹس محمد علی مظہر نے ریمارکس دیے کہ ’کیس میں کوئی نئی چیز نہیں ہے، شوکاز نوٹس کے خلاف کونسل کا تو فیصلہ آچکا ہے۔‘

سپریم کورٹ کے آئینی بینچ نے مظاہرعلی نقوی کی شوکاز نوٹس کے خلاف درخواست عدم پیروی کی بنیاد پر خارج کر دی۔

واضح رہے کہ ‏سابق جج مظاہر علی اکبر نقوی کے خلاف 10 شکایات جوڈیشل کونسل میں زیر غور ہیں۔ ‏شکایات میں جسٹس مظاہر نقوی پر مبینہ مالی بے ضابطگیوں کے الزامات عائد ہیں۔ ‏جوڈیشل کونسل نے جسٹس مظاہر نقوی کو شوکاز نوٹس جاری کیا تھا۔

جسٹس مظاہرعلی اکبر نقوی نے اپنے خلاف سپریم جوڈیشل کونسل کی کارروائی کو سپریم کورٹ میں چیلنج کیا تھا۔

79 ہزار عازمینِ حج کی درخواستیں منظور: ترجمان مذہبی امور

ترجمان وزارتِ مذہبی امور کا کہنا ہے کہ 10 دسمبر تک درخواستیں جمع کروانے والے تمام 79 ہزار عازمینِ حج کی درخواستیں منظور کر لی گئی ہیں۔

ترجمان مذہبی امور کے مطابق ’گذشتہ ایک ہفتہ کی توسیع کے دوران 10 ہزار سے زائد نئی درخواستیں جمع ہوئیں۔ عازمینِ حج کے اصرار پر چند ہزار خالی  نشستوں پر پہلے آئیے پہلے پائیے کی بنیاد پر درخواستوں کی وصولی جاری رکھنے کا فیصلہ کیا گیا۔ حج کوٹہ مکمل ہوتے ہی درخواستیں روکنے کا اعلان کیا جائے گا۔‘

وزارتِ مذہبی امور نے نئے حج درخواست گذاروں کو  ہدایت کی ہے کہ درخواست جمع کروانے کے بعد متعلقہ بینک سے کمپیوٹرائزڈ رسید ضرور حاصل کریں۔ کمپیوٹرائزڈ رسید پر درج تاریخ اور وقت کے حساب سے ’پہلے آئیے پہلے پائیے‘کی بنیاد پر فیصلہ کیا جائے گا۔

ترجمان کے مطابق سپانسرشپ حج سکیم بھی پہلے آئیے پہلے پائیے کی بنیاد پرجاری رہے گی۔ سرکاری کوٹہ مکمل ہونے پر حج واجبات کی دوسری قسط کی تاریخ کا اعلان کیا جائے گا۔

ترجمان نے مزید بتایا کہ عازمینِ حج نئی ہدایات مثلا بقیہ حج واجبات کا شیڈول، تربیت  اور پروازوں کی اطلاع کے لیے اپنے سمارٹ فون پر ’پاک حج موبائل ایپ‘  کا استعمال لازمی کریں۔

پاکستان بحریہ کی رائل عمان  اور سپین کے ساتھ مشترکہ مشقیں

پاکستان کی فوج کے شعبہ تعلقات عامہ کے مطابق پاک بحریہ کے جہاز پی این ایس سیف نے رائل عمان بحریہ کے جہاز ’السیب‘ اور سپین بحریہ کے جہاز ’سانتا ماریا‘  کے ساتھ مشترکہ بحری مشقیں کی ہیں۔

بیان کے مطابق ’پاک بحریہ اور رائل عمان بحریہ کے مابین مشق پاکستان کی زیر قیادت کمبائنڈ ٹاسک فورس 150 کے فوکسڈ آپریشن قراقرم ریزولو کے دوران منعقد کی گئی۔‘

فوکسڈ آپریشن میں پاکستان میری ٹائم سیکیورٹی ایجنسی کے جہاز کشمیر نے بھی حصہ لیا۔

آئی ایس پی آر کے مطابق ’پاک بحریہ اور رائل عمان بحریہ کے مابین دوطرفہ بحری مشق ثمر الطیب‘ کا انعقاد بھی باقاعدگی سے کیا جاتا ہے۔‘

بیان میں مزید کہا گیا ہے کہ ’پی این ایس سیف نے سپین بحریہ کے جہاز سانتا ماریا کے ساتھ بھی دو طرفہ مشق کا انعقاد کیا۔ مشقوں کا مقصد، خطہ میں موجود بحری افواج کے درمیان ہم آہنگی کو فروغ دینا تھا۔‘

پاکستان اور چین کے درمیان واریئر 8 مشقوں کا انعقاد: آئی ایس پی آر

پاکستان کی فوج کے شعبہ تعلقات عامہ (آئی ایس پی آر) کے مطابق پاکستان اور چین کے درمیان 19 نومبر سے 11 دسمبر تک مشترکہ جنگی مشقوں وارئیر 8 کا انعقاد کیا گیا۔

بیان کے مطابق ’انسداد دہشتگردی شعبے میں تین ہفتے طویل مشقیں ’واریئر 8‘ سالانہ مشقوں کے سلسلے میں آٹھویں مشق ہے۔‘

آئی ایس پی آر کا کہنا ہے کہ ’مشقوں میں پاکستان اور چین کے دستوں نے انسداد دہشت گردی کے حوالے سے ایک دوسرے کے تجربات سے استفادہ کیا۔‘

مشقوں کے دوران وزیٹرز ڈے تقریب کے دوران شرکا نے ٹلہ فیلڈ فائرنگ رینج کا دورہ کیا۔ تقریب میں کور کمانڈر راولپنڈی لیفٹیننٹ جنرل شاہد امتیاز نے بطور مہمان خصوصی شرکت کی۔

بیان کے مطابق ’پاکستان میں متعین چینی سفیر دیگر چینی مہمانوں کے ساتھ تقریب میں موجود تھے ،شرکا نے مشقوں کے دوران دستوں کی پیشہ وارانہ مہارت اور بلند معیار تربیت کو سراہا۔‘

کرم کی مرکزی شاہراہ جلد کھول دی جائیں گی: بیرسٹر سیف

خیبرپختونخوا کے مشیر اطلاعات بیرسٹر محمد سیف کا کہنا ہے کہ ضلع کرم کی مرکزی شاہراہیں بہت جلد آمد و رفت کے لیے کھول دی جائیں گی۔

مشیر اطلاعات بیرسٹر سیف نے ضلع کرم کے گرینڈ جرگے سے خطاب کرتے ہوئے کہا کہ ’دونوں فریقین امن چاہتے ہیں، تاہم کچھ عناصر کے مفادات جنگ سے وابستہ ہیں۔ ضلع کرم کو بھاری ہتھیاروں سے پاک کرنا ناگزیر ہے۔‘

انہوں نے کہا کہ موجودہ گرینڈ جرگے کو اس بار اس مسئلے کا مستقل حل نکالنا ہوگا تاکہ آئندہ نسلیں اس لعنت سے محفوظ رہ سکیں۔‘

بیرسٹر سیف نے بتایا کہ ’صوبائی حکومت ہیلی کاپٹر سروس کے ذریعے ادویات کی فراہمی جاری رکھے گی۔ فضائی آمد و رفت سروس کی بحالی زیر غور ہے اور چند دنوں میں اس پر حتمی فیصلہ کیا جائے گا۔‘

مشیر اطلاعات نے مزید بتایا کہ وزیراعلیٰ خیبر پختونخوا نے گذشتہ روز منگل کو صوبائی سطح پر ایک سپروائزری کمیٹی قائم کی ہے۔ کمیٹی میں سول انتظامیہ اور قانون نافذ کرنے والے اداروں کے اعلیٰ افسران شامل ہیں۔

ملک کے بیشتر علاقوں میں ہلکی بارش کا امکان: محکمہ موسمیات

محکمہ موسمیات کے مطابق آئندہ 24 گھنٹوں کے دوران ملک کے بیشتر علاقوں میں موسم سرد اورخشک جبکہ پہاڑی علاقوں میں شدید سرد رہنے کا امکان ہے۔ 

 گلگت بلتستان، بالائی خیبرپختونخوا،کشمیر اور ملحقہ پہاڑی علاقوں میں چند مقامات پرہلکی بارش اور برفباری ہو سکتی ہے۔

 اسلام آباد اور گردونواح میں موسم سرد اور مطلع جزوی ابرآلود رہنے کا امکان ہے جبکہ مری، گلیات اور گردو نواح میں ہلکی بارش یا برفباری ہو سکتی ہے۔

 کوہستان، چترال، دیر، سوات، بٹگرام، مانسہرہ، ایبٹ آباد،  کشمیر  اورگلگت بلتستان میں بھی ہلکی بارش متوقع ہے۔

جنوبی پنجاب اور بالائی سندھ میں بعض مقامات پر صبح کے اوقات میں ہلکی دُھند چھائے رہنے کا امکان ہے۔