پاکستان کا ’آپریشن بنیان مرصُوص‘، انڈیا میں متعدد فوجی تنصیبات پر میزائل حملے

سرکاری ٹی وی کے مطابق پاکستان نے انڈیا کے مسلسل حملوں کے جواب میں سنیچر کی صبح آپریشن ’بنیان مرصوص‘ (آہنی دیوار) کا آغاز کر دیا ہے۔ پاکستان نے ’فتح ون میزائل سسٹم‘ کے ذریعے انڈیا میں فوجی اہداف کو نشانہ بنایا۔

سکیورٹی ذرائع کے مطابق آپریشن ’بنیان مرصُوص‘ کے تحت انڈیا میں متعدد مقامات پر حملے کیے جا رہے ہیں۔ انڈین علاقے بیاس میں ’براہموس میزائل‘ کی سائٹ تباہ کر دی گئی ہے۔

مزید بتایا گیا ہے کہ ’پاکستان کی جوابی کارروائی کے دوران ادھم پور ایئربیس اور پٹھان کوٹ میں ایئر فیلڈ کو بھی تباہ کر دیا گیا ہے۔‘

’آپریشن ’بنیان مرصوص‘ میں اُن تمام بیسز کو ٹارگٹ کیا جا رہا ہے جہاں سے پاکستان کے عوام اور مساجد پر حملے کیے گئے۔‘

سکیورٹی ذرائع کا کہنا ہے کہ انتہائی درستگی کے ساتھ سری نگر، ادھم پور، پٹھان کوٹ، آدم پور، بھٹنڈہ، سرسا اور سورت گڑھ میں فضائی اڈوں کو نشانہ بنایا گیا ہے۔ راجوری اور برامولا میں عسکری تنصیبات کو بھی نشانہ بنایا گیا ہے۔

سکیورٹی ذرائع کے مطابق سنیچر کو پاکستان کی جانب سے انڈیا کے مختلف علاقوں میں اہم فوجی تنصیبات کو نشانہ بنایا گیا۔

’انٹیلی جنس اور فیلڈ رپورٹس کے مطابق ان حملوں میں بڑے پیمانے پر تباہی ہوئی ہے جبکہ انڈیا کے کئی فوجی ہلاک اور زخمی بھی ہوئے ہیں۔‘

‏سکیورٹی ذرائع کے مطابق پاکستانی حملے کے دوران بیاس میں براہموس میزائل سٹوریج تباہ جبکہ ادھم پور ایئر ڈیفنس سسٹم اور ایئر بیس کو شدید نقصان پہنچا۔

’پٹھان کوٹ ایئر فیلڈ، جالندھر،گجرات اور راجستھان کے فوجی اڈوں پر حملے کیے گئے جبکہ نئی دہلی پر فائر کیا گیا میزائل حصار (ہریانہ) کے قریب روکا گیا۔

‘سکیورٹی ذرائع کا مزید کہنا ہے کہ ’سری نگر ایئر بیس پر حملے میں 20 انڈین فوجی ہلاک ہوگئے ہیں جبکہ چندی گڑھ میں ہتھیاروں کا ڈپو تباہ کردیا گیا ہے۔‘

’انڈیا کی سرسہ ایئر فیلڈ کو بھی تباہ کر دیا گیا ہے جس کی تصدیق خود انڈین میڈیا نے بھی کی ہے۔ اس کے علاوہ راجوڑی میں پاکستان میں دہشت گردی کروانے والا انڈین ملٹری انٹیلیجنس کا تربیتی مرکز بھی حملے میں تباہ ہو گیا ہے۔‘

‏سکیورٹی ذرائع کا کہنا ہے کہ ’پاکستانی فضائیہ کے جے ایف 17 تھنڈر کے ہائپر سونک میزائلوں نے آدم پور میں انڈیا کا S-400 سسٹم تباہ کر دیا جس کی مالیت ڈیڑھ ارب ڈالر ہے۔‘

اس سے قبل افواج پاکستان کے ترجمان لیفٹیننٹ جنرل احمد شریف چوہدری نے کہا ہے کہ ’انڈیا نے نور خان ایئربیس راولپنڈی، شور کوٹ بیس اور مرید بیس پر میزائل داغے ہیں۔‘

جمعے اور سنیچر کی درمیانی رات میڈیا بریفنگ میں انہوں نے بتایا کہ ’انڈیا نے فضا سے زمین پر مار کرنے والے میزائلوں کے ذریعے پاکستانی بیسز کو نشانہ بنایا۔‘
لیفٹیننٹ جنرل احمد شریف چوہدری کا کہنا تھا کہ ’پاکستان کے ایئر ڈیفنس سسٹم نے ان میں سے بیشتر میزائلوں کو ہدف پر پہنچنے سے پہلے ہی گرا دیا گیا۔‘