حج سیزن، وزارت تجارت کی ٹیموں نے مارکیٹوں کی نگرانی سخت کردی

سعودی وزارتِ تجارت نے حج سیزن کے آغاز کے ساتھ مارکیٹوں اور ریستوران کی نگرانی کا عمل سخت کردیا ہے۔

تفتیشی ٹیمیں مکہ مکرمہ، مدینہ منورہ اور ان دونوں شہروں کے درمیان ہائی ویزے پر موجود سٹورز وغیرہ کی چیکنگ کررہی ہیں۔

عاجل نیوز کے مطابق گزشتہ 15 دنوں میں وزارت تجارت کی تفتیشی ٹیموں نے 19 ہزار دورے کے جن میں  اشیائے خورونوش کی دکانوں، مارکیٹس اور عازمین کے لیے کیٹرنگ کی خدمات فراہم کرنے والے ادارے شامل تھے۔

وزارت کی تفتیشی ٹیموں نے مسجد الحرام اور مسجد نبوی کے مرکزی ایریا جہاں عازمین حج کی عمارتیں موجود ہیں وہاں کی دکانوں کا خاص طورپر جائزہ لیا تاکہ اس امر کو یقینی بنایا جاسکے کہ وہاں فروخت کی جانے والی اشیا غیرمعیاری نہ ہوں۔

وزارت کی جانب سے  نگرانی آپریشن حج ایام میں بھی جاری رکھنے کا عندیہ دیا گیا ہے تاکہ مشاعر مقدسہ (منی، عرفات اور مزدلفہ) میں اشیائے خورونوش کے معیار کو جانچا جائے۔