امریکہ میں برفانی طوفان کا خطرہ، 12 ہزار پروازیں منسوخ، بجلی کی بندش
امریکہ میں برفانی طوفان کا خطرہ، 12 ہزار پروازیں منسوخ، بجلی کی بندش
ہفتہ 24 جنوری 2026 17:51
امریکہ میں آئندہ چند راتوں میں درجہ حرارت زیادہ تر سنگل ڈیجٹس میں رہے گا۔ (فوٹو اے پی)
امریکہ بھر میں ہفتے کے آخر میں روانہ ہونے والی تقریباً 12 ہزار پروازیں منسوخ کر دی گئی ہیں، کیونکہ ایک طاقتور طوفان کی وجہ سے شدید تباہی، کئی دنوں تک بجلی کی فراہمی معطل رہنے اور اہم شاہراہوں کی بندش کا خطرہ ہے۔
امریکی خبر رساں ادارے ایسوسی ایٹڑ پریس کے مطابق نیو میکسیکو سے نیو انگلینڈ تک تقریباً 14 کروڑ افراد سرمائی طوفان کی وارننگ کی زد میں ہیں۔ نیشنل ویدر سروس کی پیش گوئی کے مطابق وسیع پیمانے پر شدید برف باری اور تباہ کن برفانی بارش کا ایک سلسلہ مشرقی ٹیکساس سے نارتھ کیرولائنا تک پھیلا ہوا ہے۔
محکمہ موسمیات کے ماہرین کا کہنا ہے کہ خاص طور پر برفانی بارش سے متاثرہ علاقوں میں ہونے والا نقصان کسی سمندری طوفان کے برابر ہو سکتا ہے۔
فورٹ ورتھ کی نیشنل ویدر سروس کے مطابق شمالی ٹیکساس میں رات بھر برف اور اولوں کی بارش کے بعد یہ سلسلہ سنیچر ریاست کے وسطی علاقوں کی جانب بڑھ رہا ہے۔
ادارے نے سوشل میڈیا پلیٹ فارم ایکس پر کہا کہ ’انتہائی سرد درجہ حرارت اور خطرناک حد تک ٹھنڈی ہوائیں علاقے میں پھیل رہی ہیں اور پیر تک برقرار رہیں گی۔‘
آئندہ چند راتوں میں درجہ حرارت زیادہ تر سنگل ڈیجٹس میں رہے گا، جبکہ محسوس ہونے والا درجہ حرارت منفی 12 ڈگری فارن ہائیٹ تک جا سکتا ہے۔
صبح آٹھ بجے (ایسٹرن ٹائم) تک ملک بھر میں تقریباً 68 ہزار بجلی کی بندشیں رپورٹ ہوئیں، جن میں سے 27 ہزار 600 صرف ٹیکساس میں تھیں۔ اوکلاہوما میں برف اور اولوں کی بارش کا سلسلہ جاری رہا۔
سنیچر کو تین ہزار 300 سے زائد پروازیں تاخیر کا شکار ہوئیں یا منسوخ کر دی گئیں۔ (فائل فوٹو: اے ایف پی)
ایک درجن سے زائد ریاستوں کے گورنروں نے آنے والے خراب موسم کے پیش نظر ہنگامی صورت حال کا اعلان کیا یا شہریوں سے گھروں میں رہنے کی اپیل کی ہے۔
ٹیکساس کے گورنر گریگ ایبٹ نے سوشل میڈیا پلیٹ فارم ایکس پر بتایا کہ ’ریاست کا محکمہ ٹرانسپورٹیشن سڑکوں پر پیشگی اقدامات کر رہا ہے اور شہریوں کو ہدایت کی کہ اگر ممکن ہو تو گھر پر رہیں۔‘
فلائٹ ٹریکنگ ویب سائٹ فلائٹ اویئر کے مطابق سنیچر کو تین ہزار 300 سے زائد پروازیں تاخیر کا شکار ہوئیں یا منسوخ کر دی گئیں، جبکہ اتوار کے لیے تقریباً چھ ہزار پروازیں منسوخ کی گئیں۔
محکمہ موسمیات کا کہنا ہے کہ برفانی بارش سے متاثرہ علاقوں میں ہونے والا نقصان کسی سمندری طوفان کے برابر ہو سکتا ہے۔ (فوٹو: اے پی)
یوٹیلیٹی کمپنیاں بجلی کی ممکنہ بندشوں کے لیے تیار ہیں، کیونکہ برف سے لدے درخت اور بجلی کی تاریں طوفان کے گزرنے کے بعد بھی گر سکتے ہیں۔
