سعودی عرب نے اقوام متحدہ کے اجلاس میں کہا ہے کہ ’فلسطین کی ریاست کو تسلیم کرنا ایک ’سٹرٹیجک ضرورت‘ ہے جو مشرق وسطی میں امن کا آغاز کرے گی۔’

یہ بیان ایسے وقت سامنے آیا ہے جب سعودی عرب اور فرانس آئندہ ماہ ایک بین الاقوامی کانفرنس کی مشترکہ صدارت کرنے کی تیاری کر رہے ہیں جس کا مقصد  دوریاستی حل پر عملدرآمد کو تیز کرنا،اسرائیل اور فلسطینیوں کے درمیان دہائیوں سے جاری تنازع کو ختم کرنا ہے۔

کانفرنس کی تیاری کے حوالے سے اقوام متحدہ کی جنرل اسبملی کے اجلاس سے خطاب میں سعودی وفد کی سربراہ منال رضوان نے کہا کہ ’مسئلہ فلسطین کا منصفانہ حل نہ صرف اخلاقی اور قانونی ضرورت ہے بلکہ یہ بقائے باہمی پرمبنی ایک نئے علاقائی نظام کی بنیاد بھی ہے۔‘

عرب نیوز اور عاجل کے مطابق ان کا کہنا تھا’ فلسطینی علاقوں سے اسرائیلی قبضے کا خاتمہ ہونا چائیے۔‘

اجلاس سے خطاب میں منال رضوان نے مزید کہا ’ ہم  مستقل اور ٹھوس، ناقابل واپسی بنیادوں پر ایسی تبدیلی کے خواہاں ہیں جو فلسطین کے مسئلے کے پرامن حل کے لیے فیصلہ کن ہو۔‘

سعودی وفد کی سربراہ نے فلسطینی صدر محمود عباس کی جانب سے کیے جانے والے اصلاحی کاموں سراہا۔

انہوں نے مزید کہا ’ہمیں صرف جنگ ختم کرنے کی ہی بات نہیں کرنا بلکہ گزشتہ 8 دہائیوں سے جاری تنازعے کے خاتمے کےلیے بات کرنا چاہئے۔‘