دادا کو سفرحج میں دو برس لگے، میں چھ گھنٹے میں مکہ پہنچی: مراکشی خاتون

مراکش سے آنے والی 82 سالہ معمرعازم حج منیرہ نے کہا ہے کہ ’ماضی کے حج کا آج سے کسی طرح بھی تقابل نہیں کیا جاسکتا، اب مہینوں کا سفرگھنٹوں میں طے ہو جاتا ہے۔‘

سعودی خبرراساں ایجنسی ’ایس پی اے‘ کے مطابق مراکش کے دارالحکومت دار البیضا کے ’محمد الخامس‘ انٹرنیشنل ایئرپورٹ پر ’مکہ روٹ‘ منصوبے کے تحت آنے والی معمر خاتون نے بتایا ’ ان کے دادا نے 7 دہائی قبل حج کیا تھا، اس میں مشکلات اور خطرات تھے۔‘

’اس سفر میں انہیں دو سال لگے، وہ متعدد ممالک سے ہوتے ہوئے مراکش سے مکہ مکرمہ پہنچے تھے۔‘

معمر خاتون کا کہنا تھا ’ جب چھوٹی تھی تو والد صاحب سے ہمیشہ دادا کے سفرِ حج کی داستان سنیں، اس وقت سے یہ بات ذہن میں بیٹھ چکی تھی کہ حج کا سفر انتہائی مشکل ہوتا ہے مگر اب تو سب کچھ بدل چکا ہے۔‘

’سوچا بھی نہ تھا کہ ہوائی جہاز میں آرام  سے بیٹھ کر صرف چھ گھنٹے میں مکہ پہنچ جاوں گی ،ماضی میں  یہ سفر دو برس پر محیط تھا۔‘

انہوں نے مزید کہا’ ایئرپورٹ پر تمام طریقہ کار ریکارڈ وقت  اور منتظم انداز میں مکمل ہوا۔‘

مراکشی خاتون نے جھریوں بھرے ہاتھ بلند کرتے ہوئے ان جملوں پر اپنی گفتگو کا اختتام کیا ’بے شک یہ سب بہت بڑی نعمت ہے، میں ان سب کےلیے میدان عرفات میں دعا کروں گی جنہوں نے ہمارے سفر کے مراحل کو آسان بنایا۔‘