مکہ روٹ عازمین کے لیے سعودی عرب کی ایک گراں قدر خدمت: صدر مالدیپ

مالدیپ کے صدر ڈاکٹر محمد معیزو نے نے مکہ روٹ پروجیکٹ کو اسلام اور مسلمانوں کی خدمات کےلیے سعودی قیادت کی علامت قرار دیا ہے۔

انہوں نے ’مکہ روٹ‘ پروگرام میں مالدیپ کو شامل کرنے پر شاہ سلمان بن عبدالعزیز اور ولی عہد محمد بن سلمان کا خصوصی طور پرشکریہ ادا کیا۔

یاد رہے کہ مالدیپ کے صدر نے پیر کو مالے میں ویلانا کے انٹرنیشنل ایئرپورٹ پر مکہ روٹ پروگرام کا افتتاح کیا تھا۔

سعودی خبررساں ایجنسی ’ایس پی اے‘ کے مطابق مالدیپ کے صدر کا کہنا تھا مملکت کی قیادت، عالم اسلام کے لیے ایک مثال ہے جو نہ صرف حرمین شریفین کی خدمت کے لیے جانی جاتی ہے بلکہ اسلامی دنیا بھی ان کی فراخدلی سے فیض یاب ہوتی ہے۔‘

انہوں نے مالدیپ سے پہلی مرتبہ ’مکہ روٹ‘ پروگرام شروع کرنے پر اسے اپنے ملک کے عازمین کے لیے ایک گراں قدر خدمت سے تعبیر کیا۔  اس اقدام سے مالدیپ سے جانے والے عازمین کو سہولت میسرآئے گی۔

انہوں نے سعودی وزارت داخ,ہ، حج وعمرہ اور دیگر اداروں کا بھی شکریہ ادا کیا۔

مکہ روٹ انیشی ایٹیو کا مقصد ان ممالک کے عازمینِ حج کو جو سعودی عرب کے لیے روانہ ہوتے ہیں، اعلٰی قسم کی خدمات دینا ہے۔ ان میں خود عازمینِ حج کے اپنے ملک میں سفری طریقۂ کار کو منظم کرنا اور اس پورے عمل کو بغیر کسی مشکل کے تکمیل تک پہچانا شامل ہے تاکہ جب وہ منزل پر پہنچیں تو انھیں مسائل کا سامنا نہ ہو۔