سعودی ولی عہد کا بین الاقوامی برادری سے غزہ میں اسرائیلی جارحیت ختم کرانے پر زور

سعودی ولی عہد و وزیراعظم شہزادہ محمد بن سلمان نےغزہ میں اسرائیلی جارحیت کے تباہ کن اثرات کے خاتمے میں بین الاقوامی برادری کے کردار کی اہمیت کو پھر اجاگر کیا ہے۔

سعودی ولی عہد سنیچر کو منیٰ پیلس میں عید الاضحیٰ کے موقع پر اسلامی شخصیات، مہمانوں اور حج وفود کے سربراہان کے استقبالیے سے خطاب کررہے تھے۔

انہوں نے کہا ’اسرائیلی جارحیت کے باعث فلسطین میں ہمارے بھائیوں کے مصائب کا سلسلہ جاری ہے۔‘

’ہم بین الاقوامی برادری کے کردار کی اہمیت کو پھر اجاگر کرتے ہیں جو اس جارحیت کے تباہ کن اثرات کے خاتمے، بے گناہ شہریوں کے تحفظ اور ایک نئی حقیقت جس میں بین الاقوامی قانونی حیثیت اور متعلقہ قراردادوں کے مطابق فلسطین میں امن قائم ہوسکے۔‘

شہزادہ محمد بن سلمان نے کہا کہ ’اللہ تعالی نے مملکت کو دو مقدس مساجد، ان کے زائرین جن میں حجاج، معتمرین اور دیگر مہمانوں کی خدمت کا اعزاز دیا ہے۔‘

’انہوں نے زور دیا کہ’ سعودی عرب نے اس مقدس فریضے کو اپنی ترجیحات میں سرفہرست رکھا ہے، اللہ کے مہمانوں کی خدمت کے لیے اپنی تمام صلاحیتوں کو بروئے کار لاتے ہوئے اس بات کو یقینی بنایا کہ وہ اپنے مناسک کو آرام اور آسانی کے ساتھ ادا کر سکیں۔‘

سعودی ولی عہد نے اس ذمہ داری کو نبھانے کے لیے مملکت کے عزم کا اعادہ کیا۔

انہوں نے مزید کہا کہ ’ہم اللہ تعالیٰ سے دعا گو ہیں کہ وہ مملکت، تمام مسلم ممالک اور دنیا بھر میں امن و سلامتی قائم رکھے۔ حجاج کے حج کو قبول فرمائے اور وہ اپنے اہل خانہ کے پاس بحفاظت واپس جائیں۔‘