خلیج عرب کے علاقے میں زلزلہ، ری ایکٹر سکیل پر شدت 3.7 ریکارڈ
سعودی جیولوجیکل سروے صورتحال کی مانیٹرنگ کر رہا ہے۔(فوٹو: اخبار 24)
خلیج عرب کے علاقے میں جمعے کو زلزلے کے جھٹکے محسوس کیے گئے ہیں جس کی شدت ری ایکٹر سکیل پر 3.7 ریکارڈ کی گئی۔
اخبار 24 کے مطابق سعودی جیولوجیکل سروے کے نیشنل سیسمک مانیٹرنگ نیٹ ورک سٹیشنوں نے جمعے کی رات نو بجکر 50 منٹ پر زلزلے کے جھٹکے ریکارڈ کیے۔
سعودی جیولوجیکل سروے کا کہنا ہے متعلقہ حکام کے ساتھ صورتحال کی مانیٹرنگ کی جا رہی ہے۔
بتایا گیا کہ عرب ٹیکٹونک پلیٹس اور یوریشین پلیٹس کے آپس میں ٹکرانے کے باعث خلیج عرب کے علاقے میں زلزلے کے جھٹکے محسوس کیے جاتے ہیں۔
یاد رہے کہ گزشتہ دنوں بھی جبیل شہر کے قریب خلیج عرب میں زلزلے کے جھٹکے محسوس کیے گئے تھے۔
