امریکہ کے ساتھ تجارتی مذاکرات اگلے ہفتے مکمل ہوں گے: پاکستان

وزیر خزانہ محمد اورنگزیب اور امریکی وزیر تجارت ہاورڈ لٹنک کے درمیان ملاقات کے بعد پاکستان نے کہا ہے کہ امریکہ کے ساتھ تجاری مذاکرات اگلے ہفتے مکمل ہو جائیں گے۔

برطانوی خبر رساں ادارے روئٹرز کے مطابق پاکستان کے وزیر خزانہ نے ایک بیان میں کہا کہ ’دونوں اطراف مذاکرات پر اطمینان کا اظہار کیا اور ان کو اگلے ہفتے مکمل کرنے کا عزم کیا۔‘

پاکستان کو امریکی صدر ڈونلڈ ٹرمپ کی طرف سے لاگو کیے گئے 29 فیصد ٹیرف کا سامنا ہے۔ 2024 میں پاکستان کا سرپلس تین ارب ڈالر تھا۔

تجارتی عدم توازن کو ختم کرنے اور ٹیرف کو کم کرنے کے لیے پاکستان نے امریکی خام تیل سمیت مزید اشیا درآمد کرنے اور امریکی کمپنیوں کے لیے مائننگ کے شعبے میں سرمایہ کاری کی پیشکش کی ہے۔

رواں ہفتے دونوں ممالک نے پاکستان کے منرل سیکٹر میں سرمایہ کاری کے لیے ایک تقریب کی مشترکہ میزبانی کی تھی جس میں سات ارب ڈالر کا ریکوڈک پراجیکٹ بھی شامل تھا۔

دونوں حکومتوں کے سینیئر عہدیداروں اور امریکی سرمایہ کاروں نے پبلک پرائیویٹ پارٹنرشپ اور ریگولیٹری اصلاحات پر بات چیت کی تھی۔

امریکی ایکسپورٹ امپورٹ بینک ریکوڈک میں 500 ملین سے ایک ارب ڈالر تک کی فنانسنگ کی تجاویز کا جائزہ لے رہا ہے۔

ڈونلڈ ٹرمپ نے گذشتہ ہفتے وائٹ ہاؤس میں فیلڈ مارشل عاصم منیر کی میزبانی کی تھی اور اس سے قبل انہوں نے کہا تھا کہ تجارت نے انڈیا اور پاکستان کے درمیان ایک بڑی کشیدگی سے بچنے میں مدد کی تھی۔