منشیات اسمگلنگ پر سعودی شہری کو سزائے موت
جمعرات 3 جولائی 2025 21:23
مملکت میں منشیات فروشی سنگین جرائم میں شامل ہے (فوٹو،ایکس اکاونٹ)
وزارت داخلہ کاکہنا ہے کہ شمالی حدود ریجن میں منشیات اسمگلنگ میں ملوث سعودی شہری کی سزائے موت کے عدالتی احکامات پر عمل درآمد کردیا گیاہے۔
اخبار 24 کے مطابق وزارت داخلہ کی جانب سے جاری تفصیلی بیان میں کہا گیا ہے کہ شمالی حدود ریجن میں مقیم سعودی شہری عبدالکریم الرویلی کو بڑی مقدار میں نشہ آور گولیاں رکھنے پر حراست میں لیا گیا تھا۔
ملزم سے ابتدائی تحقیقات میں معلوم ہوا کہ وہ بیرون ملک سے لائی گئی منشیات فروشی میں ملوث تھا جس پر محکمہ انسداد منشیات نے مقدمے کا چالان عدالت میں جمع کرادیا۔
عدالت نے ملزم کے اقبال جرم اور شواہد کی بنیاد پر اسے مملکت کے قانون کے مطابق موت کی سزا کا حکم سنا دیا۔ ابتدائی عدالتی حکم پر اپیل دائر کی گئی جسے جرم کی سنگینی کو دیکھتے ہوئے مسترد کردیا گیا۔
وزارت داخلہ نے اپیل کورٹ اور ہائی کورٹ سے سزائے موت کے فیصلے کی تصدیق ہونے پر جعمرات کے روز شمالی حدود ریجن میں موت کی سزا پر عمل درآمد کردیا۔
