او آئی سی کے سیکرٹری جنرل سے فلسطینی نمائندے کی ملاقات، غزہ اور مغربی کنارے کی صورتحال پر تبادلہ خیال

اسلامی کانفرنس تنظیم (او آئی سی) کے سیکرٹری جنرل حسین ابراہیم طہ سے پیر کو جدہ میں او آئی سی میں فلسطین کے مستقل نمائندے ایمبسڈر ھادی شبلی نے ملاقات کی۔

ایس پی اے کے مطابق ملاقات میں مستقل نمائندے نے فلسطین کی بگڑتی ہوئی صورتحال، غزہ میں بڑھتے ہوئے انسانی بحران، مغربی کنارے میں اسرائیلی فورسز کی جانب سے جاری خلاف ورزیوں اور جرائم کی تفصیلات سے آگاہ کیا۔

اسرائیلی وزرا اور حکام کے اشتعال انگیز بیانات، مغربی کنارے کو ضم کرنے کے منصوبے اور اس علاقے پر اسرائیلی خود مختاری کے دعوے پر بھی بات چیت کی گئی۔

 حسین ابراہیم طہ نے فوری اور دیرپا جنگ بندی، غزہ میں انسانی امداد کی فراہمی، فلسطینیوں کے لیے بین الاقوامی تحفظ کو یقینی بنانے اور اقوام متحدہ کی قراردادوں کے مطابق دو ریاستی حل کی سپورٹ کے لیے او آئی سی کے عزم کا اعادہ کیا۔