رائل سعودی نیول فورسز کے چیف کا پاکستان بحریہ کے ہیڈکوارٹرز کا دورہ

رائل سعودی نیول فورسز کے چیف آف سٹاف ایڈمرل محمد بن عبدالرحمان الغریبی نے پاکستان بحریہ کے سربراہ ایڈمرل نوید اشرف سے ملاقات کی۔

منگل کو پاکستان بحریہ کی جانب سے جاری بیان میں بتایا گیا ہے کہ رائل سعودی نیول فورسز کے چیف آف سٹاف ایڈمرل محمد بن عبدالرحمان الغریبی نے نیول ہیڈ کوارٹر اسلام آباد کا دورہ کیا اور اس موقع پر ایڈمرل نوید اشرف نے ان کا استقبال کیا۔

ان کو بحریہ کے چاق و چوبند دستے کی جانب سے گارڈ آف آنر بھی پیش کیا گیا۔

رائل سعودی نیول فورسز کے چیف آف سٹاف ایڈمرل محمد بن عبدالرحمان الغریبی اور پاکستان بحریہ کے سربراہ ایڈمرل نوید اشرف نے ملاقات کے دوران باہمی دلچسپی کے امور، علاقائی میری ٹائم سکیورٹی کی صورت حال، دفاع، تربیت اور دفاع کے معاملات میں تعاون بڑھانے کے طریقوں پر تبادلہ خیال کیا۔

دونوں عہدیداروں نے اس سال شمالی بحیرہ عرب میں منعقد ہونے والی پاک بحریہ اور سعودی بحریہ کی مشق نسیم البحر کے کامیاب انعقاد کو بھی سراہا۔

ایڈمرل نوید اشرف نے میری ٹائم سکیورٹی پٹرولز کے ذریعے علاقائی استحکام کو یقینی بنانے کے لیے پاک بحریہ کے اقدامات پر روشنی ڈالی۔

وائس ایڈمرل محمد بن عبدالرحمن الغریبی نے خطے میں میری ٹائم سیکیورٹی کی مشترکہ کوششوں کے لیے پاک بحریہ کے تعاون اور غیر متزلزل عزم کو سراہا اور ان کا اعتراف کیا۔

 انہوں نے پاکستان نیول اکیڈمی اور پاک بحریہ کے جہازوں پر سعودی بحریہ کے کیڈٹس کو فراہم کی جانے والی معیاری تربیت کو بھی سراہا اور ان کی پیشہ ورانہ ترقی پر اس کے گہرے اثرات کو تسلیم کیا۔

دونوں رہنماؤں نے موجودہ دوطرفہ دفاعی تعلقات کے دائرہ کار کو مضبوط اور مزید فروغ دینے کے عزم کا اعادہ بھی کیا۔

پاکستان بحریہ اور رائل سعودی نیول فورسز کے درمیان دیرینہ اور برادرانہ تعلقات ہیں اور اس دورے سے دونوں ممالک کے درمیان دو طرفہ دفاعی تعاون کو مزید فروغ ملے گا۔