جو روٹ ٹیسٹ کرکٹ کی تاریخ کے دوسرے سب سے زیادہ رنز بنانے والے بیٹر بن گئے

مانچسٹر میں جاری انڈیا اور انگلینڈ کے درمیان ٹیسٹ میچ کے دوران سابق انگلش کپتان جو روٹ 150 رنز سکور کر کے ٹیسٹ کرکٹ کی تاریخ کے دوسرے سب سے زیادہ رنز بنانے والے بیٹر بن گئے ہیں۔

ای ایس پی این کرک انفو کے مطابق اس سے قبل وہ اکتوبر میں ایلسٹر کک کو پیچھے چھوڑ کر پہلے ہی انگلینڈ کے سب سے کامیاب بیٹر بن چکے ہیں اور اب انہوں نے راہول ڈریوڈ، ژاک کیلس اور رکی پونٹنگ کو بھی پیچھے چھوڑ دیا ہے۔

ٹیسٹ کرکٹ کی تاریخ میں سب سے زیادہ رنز بنانے والی فہرست میں اب صرف سچن ٹنڈولکر ہی ہیں جو جو روٹ سے پیچھے ہیں جن کے 15 ہزار نو سو 21 رنز ہیں۔

جو روٹ نے اپنی اننگز کا آغاز تیسرے روز 11 رنز سے کیا اور 30 رنز پر پہنچ کر راہول ڈریوڈ کو پیچھے چھوڑا اگلی ہی گیند پر انہوں نے ایک رن لے کر ژاک کیلس کو پیچھے چھوڑا، جبکہ 120 رنز پر پہنچ کر ایک اور سنگل کے ساتھ رکی پونٹنگ کو بھی پیچھے چھوڑ دیا۔

جوئے روٹ کی اس تاریخی کامیابی کے موقع پر اولڈ ٹریفورڈ کرکٹ سٹیڈیم میں تماشائیوں کا جم غفیر تھا اور اس ریکارڈ ساز کامیابی پر مجمعے نے کھڑے ہو کر تالیاں بجائی جبکہ انڈیا کے کپتان شبمن گل نے بھی ان کی کارکردگی کو سراہا۔

دلچسپ بات یہ ہے کہ جب جو روٹ 13 ہزار 380 رنز بنا کر تاریخ کے دوسرے سب سے زیادہ رنز سکور کرنے والے ٹیسٹ کرکٹر بنے تو ان سے پہلے یہ اعزاز رکھنے والے رکی پونٹنگ بھی سٹیڈیم میں موجود تھے اور کمنٹری کر رہے تھے۔

انہوں نے جو روٹ کو اس کامیابی پر خراج تحسین پیش کرتے ہوئے کہا کہ ’جو روٹ کو مبارک ہو، کیا ہی شاندار کارکردگی ہے، وہ اب دوسرے نمبر پر ہیں اور 120 رنز پر ناٹ آؤٹ ہیں۔‘

انہوں نے اپنی بات جاری رکھتے ہوئے کہا کہ ’اولڈ ٹریفورڈ کا یہ باشعور مجمع کھڑا ہو کر تالیاں بجا رہا ہے، اب بس ایک اور ریکارڈ باقی ہے۔ تقریباً ڈھائی ہزار رنز سچن سے پیچھے ہیں، لیکن پچھلے چار پانچ برسوں میں ان کی کارکردگی دیکھ کر لگتا ہے کہ وہ یہ بھی حاصل کر سکتے ہیں۔‘

رکی پونٹنگ کا مزید کہنا تھا کہ ’157 ٹیسٹ میچوں میں انہوں نے زبردست کارکردگی دکھائی ہے۔ وہ ہمیشہ مستقل مزاج بیٹر رہے ہیں۔ آپ کو یاد نہیں پڑتا کہ انہوں نے کبھی طویل عرصے تک خراب فارم میں وقت گزارا ہو۔ پچھلے چند سالوں میں جب بھی وہ پچاس رنز تک پہنچے تو انہوں نے سنچری ضرور بنائی اور وہ بھی بڑی سنچریاں، جو ایک عظیم کھلاڑی کی پہچان ہے۔‘

جو روٹ اولڈ ٹریفورڈ سٹیڈم میں ایک ہزار سے زیادہ ٹیسٹ رنز بنانے والے پہلے کھلاڑی بھی بن گئے ہیں۔

جو روٹ کی اس اننگز کی بدولت انگلینڈ نے انڈیا کے خلاف چوتھے ٹیسٹ میں پہلی اننگز میں مضبوط برتری حاصل کر لی ہے جبکہ پانچ ٹیسٹ میچوں کی سیریز میں انگلینڈ کو انڈیا پر 1-2 سے برتری حاصل ہے۔