سعودی طلبا کا نیوکلیئر سائنس اولمپیاڈ کے دوسرے مرحلے میں مقابلہ

سعودی عرب کے طلبا کی ایک ٹیم نے ملا ئیشیاکے دارالحکومت کوالالمپور میں ہونے والے انٹرنیشنل نیوکلیئر سائنس اولمپیاڈ کے دوسرے مرحلے کو مکمل کر لیا ہے۔

سعودی پریس ایجنسی ایس پی اے کے مطابق طلبا نے پانچ پانچ گھنٹے پر مشتمل تھیوری اور پریکٹیکل امتحانات دیے۔ یہ مقابلہ 30 جولائی کو شروع ہوا اور 6 اگست کو اختتام پذیر ہوا۔

ان امتحانات میں ایک پریکٹیکل سمیولیشن شامل تھی جس میں نیوکلیئر سائنس کے شعبے میں طلبا کی تجزیاتی اور تخلیقی صلاحیتوں کا امتحان لیا گیا۔

چار طلبا پر مشتمل سعودی ٹیم اب اپنے نتائج کی منتطر ہے جنہوں نے 13 ممالک سے تعلق رکھنے والے 52 طلبا کے ساتھ مقابلہ کیا۔

سعودی طلبا کو اس مقابلے لیے کنگ عبدالعزیز اینڈ کمپینیئنز فاؤنڈیشن فار گفٹڈنیس اینڈ کریٹیویٹی کی جانب سے معنقدہ سخت تربیتی اور انتخابی مراحل کے بعد منتخب کیا گیا۔

یہ انتخاب وزارت تعلیم، کنگ عبدالعزیز سٹی برائے سائنس و ٹیکنالوجی اور کنگ عبدالعزیز سٹی برائے ایٹمی و قابل تجدید توانائی کے اشتراک سے مکمل کیا گیا۔

سعودی طلبا کی ٹیم میں الاحسا سے حسن علی العواض، جدہ سے عزام خالد العمری، مدینہ سے البرا سعید عواجی اور جبیل سے ابراہیم عبدالعزیز العثمان شامل ہیں۔

انٹرنیشنل نیوکلیئر سائنس اولمپیاڈ سعودی عرب کی دوسری شرکت ہے، گزشتہ برس ہونے والے پہلے مقابلے میں ایک سلور اور تین برونز میڈلز جیتے تھے۔

انٹرنیشنل نیوکلیئر سائنس اولمپیاڈ جو 2024 میں انٹرنیشنل اٹامک انرجی ایجنسی کے تحت قائم کی گئی تھی، ایک عالمی سائنسی پلیٹ فارم ہے۔

اس مقابلے کا مقصد نیوکلیئر ٹیکنالوجی کے پرامن اور محفوظ استعمال کو فروغ دینا، نوجوانوں کو اس شعبے میں مہارت حاصل کرنے اور جدت لانے کی ترغیب دینا ہے۔