سعودی عرب کے بیشتر علاقے آئندہ منگل تک بارش کی زد میں رہیں گے

سعودی محکمہ شہری دفاع نے مملکت کے بیشترعلاقوں میں آئندہ منگل تک گرج چمک کے ساتھ بارش کا امکان ظاہر کیا ہے۔

ان دنوں ممکت بھر میں گرمی کی شدت ہے۔ بارش سے درجہ حرارت میں کمی سے موسم بہتر ہونے کی توقع کی جا رہی ہے۔

ایکس اکاونٹ کے مطابق جازان، مدینہ، نجران، الباحہ اور عسیر ریجن کے علاقے موسلا دھار بارش سے متاثر ہوں گے۔ گرد آلو ہوائیں چلنے اور ژالہ باری کا امکان ہے۔

مکہ مکرمہ ریجن کے علاقے بھی بارش کی زد میں ہوں گے، ان میں مکہ شہر، طائف، میسان، اضم، العرضیات، الجموم، بحرہ، المویہ، تتربہ، الخرمہ، اللیث، القنقذہ، رنیہ اور الکامل شامل ہیں۔

محکمہ شہری دفاع نے بیان میں شہریوں کو احتیاطی تدابیر کے ساتھ خود کو محفوظ مقامات تک محدود رکھنے کا مشورہ دیا ہے۔

  بیان میں کہا گیا ’سیلاب سے متاثرہ مقامات، وادیوں اور نشیبی مقامات سے دور رہیں۔ ایسے مقامات پر جہاں بارش کا پانی جمع ہو تیراکی سے گریز کیا جائے‘۔

 سرکاری چینلز اور سوشل میڈیا پلیٹ فارمز کے ذریعے اعلان کردہ شہری دفاع کی ہدایات پر عمل کیا جائے۔