سعودی قیادت کی جانب سے شہری کی شجاعت پر میڈل اور ایک ملین ریال انعام

خادم حرمین شریفین شاہ سلمان بن عبدالعزیز آل سعود نے ولی عہد و وزیراعظم شہزادہ محمد بن سلمان کی سفارش پر سعودی شہری ماہر فھد الدلبحی کے لیے اول درجے کا شاہ عبدالعزیز میڈل اور ایک ملین ریال دینے کی ہدایت کی ہے۔

سعودی خبررساں ادارے ’ایس پی اے کے مطابق یہ میڈل اور انعام سعودی شہری کے بہادرانہ اور جرات مندانہ اقدام کے اعتراف میں دیا گیا ہے جس نے حاضر دماغی اور غیرمعمولی جرات کا مظاہرہ کرتے ہوئے جلتے ہوئے ٹرک کو پٹرول سٹیشن سے باہر نکال کر علاقے کو بڑے خطرے اور ممکنہ تباہی سے بچایا تھا۔

 سعودی شہری ماہر الدلبحی اور ان کے اہل خانہ نے اس اعزاز اور انعام پر اعلی قیادت کا شکریہ ادا کیا ہے۔