سعودی عرب میں سیاحت کے فروغ کے لئے عالمی تشہیری مہم

سعودی سیاحت اتھارٹی نے سٹار فٹبالر کرسٹیانو رونالڈو کی شمولیت کے ساتھ عالمی سیاحتی مہم شروع کی ہے۔

سبق ویب سائٹ کے مطابق اتھارٹی نے دنیا بھر کے سیاحوں کو راغب کرنے کے لیے ’سعودی ایونٹس کلینڈر‘ جاری کر دیا ہے جس پر سٹار فٹبالر رونالڈو کی تصویر ہے اور جس پر ’میں فٹبال کے لیے آیا تھا اور مزید لطف اندوز ہونے کے لیے رکا رہا‘ تحریر ہے۔

اس کا مقصد سعودی عرب میں سال بھر منعقد ہونے والے عالمی ایونٹس کے تنوع اور شاندار مواقع کو اجاگر کرنا ہے۔

اتھارٹی نے کہا ہے کہ ’یہ مہم یورپ، انڈیا اور چین سمیت دیگر اہم ممالک کو ہدف بنا رہی ہے اور اس میں عالمی سطح کے ایونٹس شامل ہیں، جیسے فیفا ای ورلڈ کپ برائے الیکٹرانک سپورٹس، فارمولاون، لِو گالف چیمپئن شپ، بڑے ٹینس اور باکسنگ ٹورنامنٹس اور روشن سعودی لیگ‘۔

یہ ایونٹس سعودی عرب کی پوزیشن کو کھیلوں کے بڑے عالمی مرکز کے طور پر مستحکم کر رہے ہیں، خاص طور پر آئندہ ہونے والے بڑے ایونٹس جیسے ایشین کپ 2027، الیکٹرانک سپورٹس اولمپکس 2027، ایشین ونٹر گیمز 2029 اور فیفا ورلڈ کپ 2034۔

اتھارٹی نے واضح کیا کہ سعودی عرب صرف کھیلوں تک محدود نہیں بلکہ ثقافت اور تفریح کے شعبوں میں بھی نمایاں ترقی کر رہا ہے۔

 اس میں ریاض فیشن ویک، ریڈ سی انٹرنیشنل فلم فیسٹیول، ساؤنڈ سٹورم اور ریاض، الدرعیہ اور العُلا کے سیزن شامل ہیں۔

 اس کے علاوہ موسیقی، کامیڈی اور تھیٹر کے عالمی شوز کی میزبانی بھی کی جا رہی ہے جو سعودی عرب کو سیاحت، ثقافت، تفریح اور کھیلوں کی عالمی منزل بنانے میں اہم کردار ادا کر رہے ہیں۔