سعودی عرب کی دوحہ پر حملوں کی شدید مذمت، ولی عہد کا امیرِقطر سے فون پر رابطہ

سعودی عرب نے قطر پر اسرائیل کے فضائی حملوں کی شدید مذمت کی ہے۔

عرب نیوز کے مطابق سعودی عرب نے منگل کو قطر پر ہونے والے حملوں کو ’اسرائیل کی ظالمانہ جارحیت‘ قرار دیا ہے۔

اس سے قبل اسرائیل نے کہا کہ ان حملوں میں دوحہ میں حماس کے عہدے داروں کو نشانہ بنایا گیا ہے۔

سعودی پریس ایجنسی کے مطابق سعودی ولی عہد شہزادہ محمد بن سلمان نے قطر کے امیر شیخ تمیم بن حمد الثانی سے ٹیلی فون پر گفتگو کرتے ہوئے مملکت کی جانب سے قطر کے ساتھ ’مکمل یکجہتی‘ کا اظہار کا ہے۔

سعودی ولی عہد نے قطر کی سلامتی اور خودمختاری کے تحفظ کے لیے ’تمام صلاحیتیوں کے ساتھ قطر کی حمایت کے عزم کا اظہار کیا ہے۔

اس سے قبل سعودی وزارت خارجہ نے اپنے بیان میں اسرائیل کے حملے کو ’بین الاقوامی قوانین اور اقوام متحدہ کے چارٹرکی کھلی خلاف ورزی‘ قرار دیتے ہوئے اس خدشے کا اظہار کیا تھا کہ اس ے خطے کے امن مزید غیرمستحکم ہو سکتا ہے۔

متحدہ عرب امارات (یو اے ای) نے بھی اس حملے کی مذمت کی ہے۔ اماراتی وزیرخارجہ شیخ عبداللہ بن زید النہیان نے اس حملے کو قطر کی سالمیت اور بین الاقومی قانون کی ’کھلی اور بزدلانہ‘ خلاف ورزی قرار دیا ہے۔