عربین لیپرڈ فنڈ کے تعاون سےعمان میں ’ویٹرنری موبائل کلینک‘ کا افتتاح
متحرک موبائل کلینک میں جدید ترین طبی آلات فراہم کیے گئے ہیں(فوٹو، ایس پی اے)
عربین لیپرڈ فنڈ کے تعاون سے سلطنت عمان میں ماحولیاتی اتھارٹی نے مسقط میں ویٹنری موبائل کلینک کا افتتاح کر دیا ہے۔ اس موقع پر عمان میں سعودی عرب کے سفیر ابراہیم بیشان اور عمانی ماحولیاتی ادارے کے ڈائریکٹر ڈاکٹرعبداللہ العمری بھی موجود تھے۔
سعودی خبررساں ادارے ’ایس پی اے‘ کے مطابق عربی النسل چیتے کے تحفظ کے لیے قائم کیے جانے والے فنڈ کی جانب سے عمان کے کمشنری ’ظفار‘ میں موبائل کلینک کا انتظام کیا گیا ہے۔
عمان کا الظفار پہاڑی علاقہ عربی النسل چیتے کا خاص مسکن ہے جہاں ان کے تحفظ اور نسل کو بڑھانے کے لیے خصوصی اہتمام کیا جاتا ہے۔
جانوروں کے لیے موبائل کلینک کا مقصد فوری طبی امداد کی فراہمی کو یقینی بنانا ہے تاکہ ان کی نسل کو بڑھایا اور بہتر ماحول کی فراہمی کو یقینی بنایا جائے۔
موبائل کلینک میں جدید ترین طبی آلات، ادویات اور ماہرین کی فراہمی کو یقینی بنایا گیا ہے جو کمشنری کے مختلف مقامات پر جا کر عربی النسل چیتوں پر نگاہ رکھیں گے۔
