نئے حج سیزن کی تیاریاں، 75 سے زیادہ ملکوں کے ساتھ اجلاسوں کا سلسلہ مکمل

سعودی وزارت حج وعمرہ نے متعدد ممالک کے ساتھ حج 1447 ہجری کے لیے تیاریوں کے حوالے سے ہونے والے اجلاسوں کا سلسلہ مکمل کرلیا۔

عاجل نیوز کے مطابق وزارتِ حج کی جانب سے اس سال خدمات کے معیار میں مزید بہتری لانے اور بروقت معاملات کو مکمل کرنے کے حوالے سے 75 سے زیادہ ملکوں کے حکام کے ساتھ ورچوئل اجلاس منعقد کیے۔

ان اجلاسوں میں آئندہ برس کےلیے ضیوف الرحمان کو فراہم کی جانے والی خدمات کے بارے میں تفصیل سے بات ہوئی۔

 وزارت حج وعمرہ نے بتایا تیاری اجلاسوں کو قبل از وقت منعقد کرنے کا مقصد سروسز اور حج پروگرام کے بارے میں بیرونی اداروں کو مطلع کرنا تھا تاکہ حجاج کی آمد وروانگی کے معاملات کو مکمل کیا جاسکے ۔

اس سے قبل وزارت حج نے متعلقہ اداروں کے ساتھ 50 سے زیادہ اجلاس منعقد کیے۔

 ان اجلاسوں میں ایک نے انیشیٹو’سعودی بس‘  پر اتفاق کیا گیا جس کا مقصد عازمین حج کے لیے ٹرانسپورٹ کے تجربے کو اعلی معیار تک پہنچانا ہے۔

 ’نسک مسار‘ پلیٹ فارم پر بیرونِ ملک کے عازمین حج کے لیے 16 سے زیادہ کمپنیوں کی منظوری دی گئی۔

 24 سے زیادہ کمپنیوں کو بیرونِ ملک کےعازمین کو خدمات فراہم کرنے کے لیے اہل قرار دیا گیا ہے اور ان کی تیاریوں کی تصدیق کی گئی ہے۔