Sorry, you need to enable JavaScript to visit this website.

امریکہ، ایران میں جلد معاہدے کی امید، طویل جنگ عالمی معیشت کے لیے خطرہ: اسحاق ڈار

وزیرِ خارجہ اسحاق ڈار نے کہا کہ 18 جون کے معاہدے کی خلاف ورزیوں کے باوجود پاکستان امن عمل کے لیے بدستور پُرعزم ہے (فائل فوٹو: اے ایف پی)
پاکستان کے نائب وزیراعظم اور وزیر خارجہ اسحاق ڈار نے امریکہ اور ایران کے درمیان معاہدہ طے پانے کے حوالے سے امید کا اظہار کرتے ہوئے کہا ہے کہ دنیا مشرقِ وسطیٰ میں طویل عرصے تک جاری رہنے والی جنگ کی متحمل نہیں ہو سکتی۔
اسحاق ڈار نےسنیچر کو  پی ٹی وی نیوز پر نشر ہونے والے یورونیوز کو انٹرویو میں کہا کہ ’میں پیدائشی طور پر ایک پُرامید انسان ہوں۔ مجھے یقین ہے کہ ہم کسی نہ کسی وقت، اور میری امید ہے کہ یہ وقت جلد آئے گا، اِس مقصد کو حاصل کرنے میں کامیاب ہو جائیں گے۔‘
اُنہوں نے خبردار کیا کہ لڑائی جاری رہنے سے توانائی کی فراہمی میں خلل مزید گہرا ہوگا، قیمتوں میں اضافہ ہوگا اور عام شہریوں کی مشکلات بڑھیں گی، جن سے پاکستان بھی متاثر ہوگا۔
اسحاق ڈار نے کہا کہ 18 جون کے معاہدے کی خلاف ورزیوں کے باوجود پاکستان امن عمل کے لیے بدستور پُرعزم ہے اور امریکہ اور ایران دونوں پر زور دے رہا ہے کہ وہ اپنے وعدوں کی پاسداری کریں۔
انہوں نے ایک آزاد اور کثیرالجہتی خارجہ پالیسی کے لیے پاکستان کی حمایت کا اعادہ کیا اور دونوں فریقوں کے درمیان براہِ راست مذاکرات ممکن بنانے کے لیے پاکستان کی کوششوں کی تفصیلات بیان کیں۔
اسحاق ڈار نے کہا کہ بڑے بین الاقوامی تنازعات حل کرنے کا واحد قابلِ عمل راستہ سفارت کاری ہے۔ اُنہوں نے یکطرفہ اقدامات اور گروہ بندی کی سیاست کو مسترد کرتے ہوئے مزید کہا کہ پاکستان نے اقوام متحدہ کی سلامتی کونسل میں 2025-20-26 کی اپنی مدت کے دوران تنازعات کے پُرامن حل اور قومی خودمختاری کے احترام کی حمایت کی تھی۔

شیئر: