مکہ اور مدینہ میں عازمین حج کے عارضی رہائشی مراکز کےلیے نئے ضوابط

سعودی وزارتِ بلدیات نے عازمین حج کی سلامتی و تحفظ کو یقینی بنانے کے لیے مکہ مکرمہ اور مدینہ منورہ میں عارضی رہائش کے نئے ضوابط جاری کردیے۔

عکاظ کے مطابق نئے ضوابط مکہ مکرمہ اور مدینہ منورہ میں عازمین حج وعمرہ زائرین کے لیے فراہم کی جانے والی عارضی رہائش پر لاگو ہوں گے۔

ضوابط کی سب سے اہم شق وزارت کے مقررہ کردہ نکات کے مطابق عمارت کا لائسنس (این اوسی) حاصل کیا گیا ہو۔

وزارت نے عارضی رہائش میں مرکزی کچن بنانے پر پابندی عائد کی ہے۔ رہائش میں مقیم عازمین یا عمرہ زائرین کے لیے معروف و لائسنس یافتہ کیٹرنگ سروس کی خدمات حاصل کرسکتی ہیں۔

 علاوہ ازیں اشیائے خورونوش کے لیے وینڈنگ مشینوں کی سہولت رہائش پر فراہم کی جاسکتی ہے تاہم وہ بھی این او سی سے مشروط ہوں گی۔

دیگر شرائط میں کہا گیا کہ عارضی رہائشی مرکز میں لانڈری کی سہولت فراہم کی جائے جبکہ عمارت کی بیسمنٹ یا پارکنگ ایئریا تجارتی یا تفریحی مقام کے طورپر استعمال نہ کیا جائے یہ جگہ صرف سروسز یا پارکنگ کے لیے ہی مخصوص ہو۔

عمارت میں فائرفائٹنگ کا مناسب بندوبست ہونا ضروری ہے جس کے لیے شہری دفاع کی جانب سے مقرر کردہ نکات پرعمل کیا جائے۔

کسی بھی ہنگامی صورتحال میں شہری دفاع کی گاڑیوں کو متاثرہ عمارت تک پہنچنے میں کسی قسم کی دقت کا سامنا نہ کرنا پڑے ۔

عمارتوں میں ایمرجنسی ایگزٹ کا ہونا ضروری ہے کم ازکم دو ہنگامی راستے عمارت میں بنائیں جائیں۔ عمارت کے اندرونی و بیرونی ڈیکور سعودی تعمیراتی کوڈ کے مطابق ہونا ضروری ہیں جن میں تازہ ہوا کی آمد و رفت ، سیفٹی الارمز، روشنی کا مناسب بندوبست اور مستقل بنیادوں پر اصلاح و مرمت کا کام شامل ہے۔

عمارت میں بجلی کے تاروں کی نیٹ ورکنگ مناسب انداز میں کی گئی ہو جبکہ قابل اشتعال مواد کو سٹور کرنے کے لیے مقررہ ضوابط پرعمل کرنا ضروری ہے۔

مخصوص کمپنیوں کی خدمات حاصل کی جائیں جو اس قسم کے مواد کو اسٹور کرنے میں مہارت رکھتی ہیں۔

عمارتوں و رہائش کے سامنے بسوں کو ہمہ وقت کھڑا نہ رکھا جائے صرف لوگوں کو سوار کرنے یا اتارنے کےلیے اس کی اجازت ہوگی۔